Khawvel a mixed martial artist ropui ber zing ami in chawl turin thutlukna a siam a. MMA infiamna huang a chhuahsan thu a puang.
UFC leh MMA inelna lian dang ni thin World Extreme Cagefighting a featherweight champion lo ni reng tawh Jose Aldo chuan UFC a chhuahsan a, MMA a chawlhsan tih a team in an sawichiang.
UFC lam pawhin Aldo hi social media kaltlangin an thlah ve nghal a. Thawhtanni zing khan an hnena a hnuhma ropui tak a neihte chu an lawmpui thu sawi telin, “King of Rio a chawl ta. Jose Aldo Junior, i zinkawng ropui hi kan lawmpui che.” tiin an thlah.
Engtin zel?
Aldo hian UFC a contract a neihlai chu chhuahsan a lo dil tawh thu a coach leh manager Andre Pederneiras chuan a sawi a. UFC lam hian a contract chungchang erawh an la sawichiang lo.
Aldo hian MMA a chawlhsan thu puang ringawt mahse UFC contract a la neih chuan a hmalam hun a la nghawng thei.
An fighter ropui hi UFC in official rankings a neihah a tel tawh lova, hei hian ‘active roster’ ah a tel tawh lo tih a nemnghet. Mahse heng zinga tel lo an hnuaia fighter awm hi an la tam tho.
UFC hian a contract hi an titawp a nih chuan MMA ni lo combat sport dangah a inel thei dawn tihna a ni a. Amah Aldo hian boxing lama kal chu a thil chak zingah a tel tih a lo sawi tawh.
Fighter ropui Aldo
Kum 36 mi ni tawh Aldo hian kum 2004 khan a vawikhatna atan professional mixed martial arts-ah a inel tan a. A chawlh meuh chuan vawi 39 inlanin vawi 31 a chak.
MMA chanchinah a record a ropui hle. November 2009 atanga December 2015 chhung khan UFC/WEC featherweight title kawltu niin promotion pahnih a featherweight huangah vawi 9 a title a humhim.
Khawvel mixed martial artist tha ber an sawi zinga hming ri ring tak ni turin a invawrh a. Kum 2006 atanga 2014 chhung khan a zawnin vawi 18 a chak. Hetih chhunga a khingpuite hi 145 pound fighter ropui te an ni nuk a – Urijah Faber, Frankie Edgar te pawh an tel.
Kum 2015 khan UFC 194-ah Conor McGregor lakah a tlawm a, hei hian tunhnai MMA fans te sawi hlawh mahse hemi hnuah hian featherweight fighter ropui a nihna nemnghet turin featherweight champion a ni leh thei.
Amah thlaktute zingah featherweight champion lai Alexander Volkanovski pawh telin “Khawvela featherweight ropui ber hi duhsakna ka hlan.” a ti.