Spanish football club Barcelona in sum lama harsatna an neih chuan sawi hlawh thin hle mahse season liamta khan Euro maktaduai 98 hlep an neih thu an puang.
Barcelona hian nikuma an sum hmuh zawng zawng belhkhawm chu Euro tluklehdingawn 1.017 a nih thu an sawi a. Covid 19 hripui a len hnua hlep an neih leh hmasak ber a ni.
Catalan club hian tun season zawhah hian Euro maktaduai 271 vel hlep neih leh an inbeisei thu an sawi a. Tun nipuiah club sumdawnna thenkhat an hralh avangin sum an siam hnem a, hei hian tun season chhunga an sum hmuh tur belhkhawm chu Euro tluklehdingawn 1.255 velah a kai tir thei dawn niin an inbeisei.
Season liamta khan Barcelona hian an club in La Liga television rights atanga sum an hmuh tur 10% chu investment firm Sixth Street hnenah an hralh a. Hei hi June 30 hma khan tihfel niin season liamta a an sum hmuhah an chhiar tel.
Barca hian July khan Sixth Street hnenah hian LaLiga TV rights hi 15% dang hralh belh lehin Barca Studios pawh an hralh then leh tawh bawk a. Hengte atang hian hralhna man an tel dawn.