MNF party adviser, Minister of State ni bawk Lalruatkima’n “Zofa unau tam takte ram hrang hrang – India, Burma leh Bangladesh-ah te ṭhendarhin kan awm a. Zofa ṭhendarha awmte hi engtik niah emaw chuan rorelna pakhat hnuaiah kan la awm leh ang” a ti a. Chumi tur chuan ṭanrual zel a ngaih thu a sawi.
New Serchhip-a Serchhip MNF East block huaihawta Martar Ni nimina hmannaah he thu hi Lalruatkima chuan a sawi a. “Hnam tam tak ram nei lo an awm laia Pathianin ram ṭha tak Mizo min pek hi kan vawnhim a ṭul” tiin, “Engtik niah emaw chuan zalenna famkim kan la nei ang, Pathianin hun ṭha min la pe ang tih hi kan pawm dan a ni,” a ti.
Lalruatkima chuan Hnam pasalṭhate inpekna leh an hlutna, chawimawia chawisan a ṭul thu sawiin, thangtharte pawh martar-te inpekna hlut zia hre thar tura tiin, “He ram tan hian enge kan tih ve theih, tih mahni inzawt ila, martar te thisenah inhlan thar ang u,” a ti bawk.
Nimin vek khan Minister of State Lalruatkima chuan Serchhip Khawtetlanga DRDA-in Rs. nuai 95 senga a sak, hawn mai theiha peih tawh District Panchayati Bhavan a tlawh a. A sak hna a that hmel hlea a hriat thu leh a rang lama hawn dan tur an ngaihtuah tur thu a sawi bawk a ni.