Ramri chungchanga nikum November 25-a Delhi-a inbiak hnuah nimin khan Mizoram Chief Minister Zoramthanga leh Assam Chief Minister Himanta Biswa Sharma te chu a hmun ngai, Assam House, Delhi-ah an inbe leh.
Sorkar thuchhuahin a tar lan danin state pahnih chief minister-te hi nimin chawhnu dar 1 khan an inkawm a, ramri chungchang te, kuhva sumdawnna chungchangte an sawi dun.
Chief minister pahnih hian state pahnih aiawh ve ve minister leh official-ten ramri chungchanga inbiakna an neih chu tluang takina kal zel nia an hriat dun thu an sawi a; ramri chungchanga inbiakna awm chu lawmawm a tih thu an sawi dun.
Nikuma an inkawm tuma an sawi bawk, kuhva chungchang an sawi nawn leh a, kuhva ro dan lo anga lo lut chu state pahnihin lo dan duna Mizorama chin kuhva hring erawh engti kawng maha dang lovin, a hralhna tur hmunah tlang zel nise an ti dun.
Assam Chief Minister Sarma chuan a tul chuan police-te hmangin kuhva hring chu dang lova tlangtir zel a tum thu Zorama chu a hrilh niin sorkar thuchhuah chuan a tar lang.
Tar lan tawh thin angin state pahnih ramri buaina chungchangah hian Union Home Minister Amit Shah ruahmanna angin nikum November 25 khan chief minister pahnih hi Assam House-ah an lo inkawm tawh a, kumin August 9-a state pahnih sorkar aiawh minister pahnihte Aizawla inbiak hnu khan chief minister pahnih hi telephone hmanga inbiain September thla tir lamah inkawm an lo rem ti dun tawh.
An ruahman lawk danah chuan September 19 khan inkawm tur an nih laiin Assam chief minister hian harsatna a neih avangin an ruahman lawkna hmasaah inbe thei ta loin, nimin an inkawm ta a ni.