Aizawl : MIZOFED Supply chain main hub (kudam), Zuangtui, Aizawl ami chu nimin khan Cooperation Minister C. Lalrinsanga’n a hawng.
Cooperation Minister chuan Supply chain main hub chu an beisei aia lian an nei thei nia sawiin, district 11-ah kuthnathawktute thar chhuah leh thil dang production collection centre sa leh tura ruahmanna a kal mek thu a sawi a. “Supply chain main hub-in a tinzawn ber chu consumer commodity bakah kuthnathawktute thawhchhuah, thlai leh thildangte suma chantirna hmun leh mipui (consumer) ten zangkhai zawk leh man man zawka an mamawhte an lei theihna tur a ni” a ti.
Mizoram khaw tam takah Farmers’ society hrang hrang a awm thu leh society te hnathawh pui turin Federation chu a khaikhawmtu a nih thu Cooperation Minister chuan a sawi a. Federation hrang hrang te chu an hma theuha hmalakna tur leh hmasawnna tur an neihah tan laa, hmasawn tum zel turin a chah.
MIZOFED-in bungraw wholesale lamah tan a la thar niin Cooperation Minister chuan a sawi a. Aizawl district leh a chhehvela mipui mamawh bungruate hralh a chak theih nan hma la tharin, packaging unit leh mobile sales unit te an indin thar niin a sawi.
Sorkar thuchhuahin a tarlan danin Supply chain main hub chu NEC atanga Post Harvest project atana Rs. nuai 461 hmuh atanga Rs. nuai 178 hmanga sak a ni a. September, 2021-ah hna tanin, kumin January-ah cement work tan a ni a, kumin July-ah sak zawh fel a ni.
Supply chain main hub-ah hian Amul, Cooker, Arham, Padma, Basmati, Mr. White, Chini, Dal te a vaiin Rs. nuai 115 man dahkhawl niin, nimin vek khan he hmun atanga bungrua chhuak hmasaber chu Lunglei-ah thawn a nih thu sorkar thuchhuah chuan a tarlang bawk.