Eng chhit man pek lawk a ngai tawh dawn; inzirtir kan ngai
Power & Electricity department chuan December, 2023 hma ngeiin pre-paid meter box vuah hman vek an tum thu an sawi a, tuna kan hman lai meter box zawng zawng hi thlak a ngai dawn tihna a ni. Kalphung leh danthar kan hman tawh dawn avangin eng chhit man pawh pe lawk chunga kan hman zel a ngai tawh dawn tih a ni a, mipui lam pawh kan lo insiamrem thiam ve zel a tul awm e.
P&E department chuan sorkar laipui hmalaknaa Revamped Distribution Sector Scheme hnuaiah consumer meter zawng zawngte pre paid smart meter-a thlak vek tura hmalak mek a ni a, smart meter kalpui tura department-in sanction a hmuh tawh thu an tar lang a, smart meter-ah hian communication atan wireless a hman dawn avangin meter dahnate hmun ualau deuh a ngai tawh dawn tih sawiin, hemi kawnga department hmalakna tha taka lo tawiawm turin mipuite an ngen a, post-paid atanga pre-paid-ah insawn a ngaih dawn avangin nakinah harsatna a thlen loh nan electric bill bate pe fel zel turin leh contracted load pawh êng an chhit tam lai ber ang mila lo inupdate turin an ngen bawk.
Sorkar lam pawh hian an thlak burh hmaa mipui hnena hriattirna leh inzirtirna a kalpui nasat deuh hi chu a ngai dawn hlein a lang a, tih dan thar ngang a nih dawn miau avangin nakina buaina kan tawh loh nan ruahmanna fel siam thuai thuai zel tum ngei bawk teh se.