Aizawl: September thla tira Excise & Narcotics Department (END) leh Central YMA hnuaia din, Central Anti-Drugs Squad (CADS)-in ruihhlo do beihpui thlaka an thawhho hnuah ruihhlo vangin thubuai paruk ziah luh a ni tawh.
Chawlhkar hnih chhungin END leh CADS thawkdunin heroin kg 1.024 leh methamphetamine kg 0.967 an man tawh a. Lirthei pali an man tawh bakah thubuai siamsak mi paruk neiin mi 13 an man tawh bawk.
Thawhlehni zan khan Tuirialah heroin gram 202 (hawng 15) leh a neitua puh – Vanchungbia (32), Haikhawl, Tuingo, Myanmar-a khawsa nia inchhal an man a. Hemi zan vek hian heroin gram 29 (hawng 2) leh a neitua puh – Henry Lalmuanpuia, Thuampui, tuna Zemabawk Tawngtai mual-a khawsa mek nia inchhal an man.
END leh CADS hian Nilaini khan Tuirial Airfield-ah heroin gram 147 (hawng 11) leh a neitu nia puh – Thasuii (32), Biaklianmawia, Tahan ‘C’ Group, Myanmar leh Duhneimawii aka Laltanpuii (25), Tahan ‘B’ Group, Myanmar-a khawsa nia inchhalte an man a, Myanmar atanga raltlan nia insawi an ni.