Aizawl: Lunglei khawpui chhung kawng siam that chungchangah nimin khan Lunglei High Powered Committee (HPC) Vice Chairman Lawmawma Tochhawng hovin a kaihhnawih mi pawimawhte an thukhawm a. PWD SDO Lalrammawia Renthlei-in kawng siam hna thawk tura thlan chu PWD hnuaia Class I contractor, PC Lalthantluanga a nih thu leh Rs. vbc 5.9 ruahman a nih thu a sawi.
He thutkhawma tar lan a nih danin kumin June 8-ah work order chhuakin, hnathawh hun chhung tura tih chu kumin June atanga December a ni a. Kumin June 20 atanga hna tan niin fur ruah tam laia hnathawh chak a harsat bakah tuiluankawr siam that leh culvert siam that tur a tam avangin a chak thei lo nia report a ni.
Tui chhe paihna ruahman mumal awm lo te, PHE pipe hlui tawh leak nasa leh mi mal in neitu tam takin kawngpuiah tui an paih mai avang tein hnathawh a hautakin kawng a titlo lo nia report a ni bawk.
PHE SE Er. Ngentluanga’n a sawi danin, Lunglei khawpui chhunga tui pipe tam zawk chu 1993-94 chhova phum niin, hmun tam takah siam that a ngai tawh a. Hemi atan hian project siam tawh niin sorkar laipuiah detailed project report (DPR) thehluh tawh a ni a. District Urban Development Officer Vanthangpuii pawhin Lungleia tuiluankawrte siam tha tura project peih fel a nih tawh thu leh Rs. nuai 80 dil mek a nih thu a sawi.
Lunglei HPC Vice Chairman Lawmawma Tochhawng chuan Lunglei chhung kawng siam that ngaite chu PWD hotute hnenah vawi eng emaw zat thlen a nih tawh thu leh bawhzui a nih thu a sawi a. Fur ruah avangin hmalak chak theih a ni lo nia sawiin Lunglei chhung kawng, Pialthleng panna kawng leh Khawiva panna kawng te ngai pawimawh hmasa turin department official-te chu a chah.
Lunglei Bawrhsap Kulothungan A pawhin Lunglei district kawng chungchangah tun thla ni 19 khan PWD hotute nen an thukhawm tih sawiin September 23-ah ATL Lunglei – Thenzawl kawng siam hnathawktu, Bhavya Constructions-te meeting tura an koh thu a sawi bawk.