Mizoram chhuahsana Tripura-a inbengbel ta Tuikuk zinga mi 1,451 chu Mizoram electoral roll atangin paih an ni tawh.
Tripura hmar lam relief camp hrang hranga hun eng emaw chen an awm hnuah January, 2020 khan Tripura-a awm nghet duhte chu an awm ngheh phalsak an ni a, a tahtawlin an hming pawh Mizoram electoral roll atanga paih an ni ta a ni.
Election department atanga The Zozam Times thudawn danin, Tripura-a in saa luahte chu Tripura sorkarin an endik a, in an sa em tih te, an inbengbel em tih te endik an nih hnuah an pawm felte chu Tripura roll-a awm tur an ni a, Tripura roll-a thun apiangte chu Tripura sorkarin Mizoram sorkarah a thlen leh a, chung mite hming chu thai chhiat zel a ni.
Nimin thleng khan Tripura roll-a thun duh, Mizoram roll atanga paih dil mi 1,430 awmin chung zinga 1,365-te hming chu thai chhiat a ni tawh.
An zinga mi 1,173 chu Mamit district chhunga mi an ni a, Kolasib district-ah 175 leh Lunglei district atangin 17 an ni a, heng bakah hian Mizorama awm thin, chhan hrang hrang vanga vote nei hman lo Tripura roll-a in thun duh mi 86-te dilna chu phalsak an ni bawk a, anni nena Mizoram atanga Tripura roll-a thun tawh zawng zawng hi an vaiin mi 1,451 an tling tawh a ni.
Tuikukte hi kum 1997 atang khan Tripura-ah an pem thla tan a, hemi hnu hian sorkar laipui ruahmannain Mizoramah hruai kir turin vawi tam ruahmanna siam a ni a; mahse, Tuikuk tam zawk erawh Mizoramah an kir duh lo.
Tuikuk chungchangah hian sorkar laipui kaihhruaina hnuaiah Tripura leh Mizoram sorkar aiawh leh Tuikuk hruaitute tum eng emaw zat inbiakna an neih hnuah January 16, 2020 khan Tuikukte Tripura-a an awm hlenna turin inremna ziah a ni ta a ni.