Aizawl: Directorate of Economics & Statistics buatsaih, ‘Annual report registration of Births & Deaths, Mizoram, 2021’ chu nimin khan tlangzarh a ni a, he lehkhabua tar lan a nih danin kum liam ta, 2021 khan Mizoram nau piang 24,314 awmin, mitthi 8,101 an awm thung.
Nikum chhunga Mizorama nau piang zawng zawng, 24,314 zinga 12,424 chu mipa niin, 11,890 chu hmeichhia an ni a, 534-in mipa an tam zawk.
Nau piang tamna ber chu Aizawl district niin, 8,683 an awm a, nau piang tlem berna, Khawzawl district-ah nikum chhung khan nau piang 402 chauh an awm thung a ni.
Nikum khan Mizoramah mitthi mipa 5,156 leh hmeichhia 2,945, an vaiin 8,101 an awm a, mipa hi 2,211 zetin an tam zawk a ni.
2021 chhunga mitthi tamna ber, Aizawl district-ah mi 3,653 an thi a, thi tlemna ber, Khawlzawl district-ah nikum chhung khan mi 182 an thi.
Nikum khan Mizoram pumah nausen kum khat hnuai lam thi 444 awmin nau thi saa piang 104 an awm bawk a ni.
‘Annual report registration of Births & Deaths, Mizoram, 2021’ an tlangzarh rual hian ‘Mizoram Statistical Abstract 2021’ pawh tlangzarh tel a ni.
Lehkhabu pahnih tlangzarh inkhawm, Economics & Statistics Conference Hall, MINECO Khatlaa neih hi Economics & Statistics Director B Lalrinhlua’n a kaihruai a, statistics officer-ten lehkhabu an buatsaih dante an sawi a ni.
He huna khuallian, Planning Secretary Lalmalsawma Pachuau, IRS chuan ram inrelbawlna kawnga hmalakna hrang hrangah statistics a pawimawhzia sawiin, nau piang zat leh mitthi zat mumal taka chhinchiah chu hnam ang pawha fimkhur ngai thil a ni tiin, Economics & Statistics department-in data pawimawh tak dah khawmna lehkhabu an siam thin chu lawmawm a tih thu a sawi bawk.