- Upa Lalthara, Kohima (9436001667)
TUNLAIA CAMPING LEH CRUSADE KAN KALPUI DÂN HI BIH CHIANA, KALHMANG |HA ZÂWK DUAN A HUN TA-IN A LANG.
22.1 A hmâa kan sawi tâk êng atanga thlir chuan, tunlaia Mizoram kohhranten camping leh crusade kan kalpui dân hi kalhmang tha zâwka duan a ngai ta niin a lang. Tunlaia camping leh crusade kan kalpui dân tlângpui hi chu kan thalaite ‘tih pian thar’ emaw, ‘pian thartîr’ emaw tumna ni deuh berin a lang thin a. Presbyterian Kohhran lehzêlin, kan thalaite ‘pian thartir’ tuma hetia hma kan la ta vak vak mai hi chu a mak tih loh rual a ni lo. Hei hi kan Kohhran Thurin te, nausên chhandamna leh nausen Baptisma kan kalpui dân te nên pawh a inmil chiah lo, kan tih tawh kha. ‘Mikhual theology-a inchâwm len tum’ anga min hmutute thlirna hi a dikna chen a awm ngei ang le.
22.2 Presbyterian Kohhran kalhmangah chuan Kristian chhungkuaa pianga seiliante hi chu an naupan laiin baptisma kan chantîrin, Kohhran huang chhûngah leh, Pathian chhungkuaah kan senglût vek tawh a; Lal Isua ringtu leh chhandamna changtu-ah kan inngai vek a ni. Chau thei, thu thei, sual kawng zawha vâk bo thei kan nih dân te, kan vah bo laia kan dinhmun dik tak te, min neitu hnêna kirleh a pawimawhzia leh, kîrleh tura rilru inlamlêt a ngaih thute pawh kan sawi tawh a. Thuthlung Hlui huna Pathian hnam thlan Israelte an Pathian laka an tlanbo thin thu leh, Pathianin a zawlneite hmanga a hnena lo kir leh tura a koh lawm lawm thin thu pawh kan sawi tawh kha. Tin, ringtuten hetianga rilru thar emaw, harh tharna emaw, inlamletna rilru emaw an neiha an tawnhriatte hi ‘pian tharna’ (gennao anothen) a ni lova, Pathian fa kan nihna inhriatchhuahna leh chuta kir lehna chu ni zawkin a lang.
22.3 Tichuan, tunlaia kan crusade leh camping-a kan Speakerte thusawiah te, kan Pastor leh Upate sermon-ah te hian, he kan nihna duhawm tak, kan nausên lai atanga Pathian fa kan lo nih tawhna hi inhrilhhriat tum thin ila. Kan thalaite zinga nun beidawng te, ruih hlo ngai te leh, sual rawngbawl mek tena an mamawh chu ‘pian tharna’ ni lovin, fapa tlanbo kan sawi tak anga ‘Pathian fa an nih inhriatchhuaha, an Pa hnena kirleh’ hi ni zawkin a lang. Tichuan, heng kan thalai sual kawng zawh mekte hi, Nikodema leh Paula te nihna hmasa (Lal Isua ringtu an nih hma) nen ngaihfin lovin, fapa tlanbo nen khan bawm khatah khung ta zawk ila; an inhriatchhuah a, an Pa hnena an rawn kir leh theihna turin tanpuiin, fuih ila, a fuh zawk a rinawm. Tin, Kohhran mipuite hnenah pawh Krista ‘chhandamna thu bul lam’ ngawt sawi tawh lovin, ringtute nihna leh vânneihna te, Pathian thuawih kawngah leh Kristian nun tha nunpui lama kan tih turte hi inhrilh uar ila, kan than a fuhin, puitlin lam kawng kan zawh theih zâwk a rinawm.
22.4 Kan tawngtainaah pawh ‘pian thar’ dil tawh lovin, Pathian fa kan nihna kan hriat chiana, chuta kan din ngheh tlat theina tur te, puitlin lam kawng kan zawha, Krista chu keimahni-ah tihpuitlina a awm theihna tur te, ringtu Pathian hlata awmte leh, a hnên tanga tlân bo mêkte an inhriatchhuaha, an inlamlêta, an Pa hnena an rawn kir leh theihna tur te-a Thlarau Thianghlim tihharhna leh tanpuina te hi dilin, hetiang hawi zâwng hian crusade leh camping te hi kalpui tawh zâwk ila, kan hlâwkpuiin, puitlin lam kan pan phah ngei pawh a rinawm.
22.5 Nagaland-ah hian Baptist Kohhran hi an lian lawr lak a. An Thurin (Doctrinal Statement)-ah chuan ‘pian tharna’ lam hawi thu tâwite heti hian a awm: “Man was created in the image of God, but fell into sin and lost; this is true of all men, and except a man be born again he cannot see the kingdom of God. Salvation is by grace through faith in Christ…” tiin. Hetah pawh hian ‘born again’ an sawi fiahna nia lang chu “Salvation is by grace through faith in Christ” tih hi ni maiin a lang a. Chhandamna hi khawngaihna avanga Krista ringtutena kan chan a ni, an ti ni berin a lang. Mizoram Baptist Kohhran Thurin nêna khaikhin chuan ‘born again’/‘pian tharna’ an sawifiah dân pawh hi a danglamin, an sawi fiahin, an sawi awlsam thiam hle chuan a lang. Tin, Nagaland-ah hian thalaite pian thartîr tum zâwnga camping an buatsaih hi hriat tur a vâng khawp mai a. Crusade kan tih ang chi hi chu an nei fo va; mahse, hêng an crusade-te hi inpian thartîr tumna ang zâwng ni lovin, intuai tharna (revival) crusade angin an kalpui thin.
22.6 Khasi-ho hi kan Presbyterian nihpui leh Kohhran lama kan ûte an ni a. Anni hi chuan ‘pian tharna’ hi Presbyterian Kohhran Thurina awm lo a nih ang ngei hian an buaipui ve lêm lo niin a lang bawk.
(la chhunzawm tur)