Aizawl : UPC (NEI) nena an thubuai High Court-in a rem dana an lungawiloh avanga UPC (Mizoram) te Supreme Court-a an zualkona chu hnawl a ni a. Court thu remna ang chuan kum 1995 leh a hma lama UPC kohhran bungruate chu UPC (Mizoram)-in chhawm theih an nei dawn lo a ni.
Hight Court chu – Mizoram UPC-in tuna UPC (NEI) te nen kohhran khata an awmho laia an bungruate, kohhran an chhuahsan tawh hnua an chuh leh chu diklo, a ti a. “Kum 1995-ah UPC (NEI) kohhran hi an chhuahsan avangin kum 1995 leh a hma lama UPC kohhran bungruate hi UPC Mizoram te hian chuh theihna (right) an nei lo” a ti. Hei hi Supreme Court pawhin lo nemnghetin, High Court thuremnaa lungawi lova UPC Mizoram te zualkona chu a lo hnawl a ni.
Court thuremna bawhzui hian UPC (NEI) North Mizoram district chu an district chhunga bungraw chinfel dan tur ngaihtuahin tun an thukhawm tawh a. 1995 leh a hma lama UPC (NEI) bungrua zawng zawng an kuta hlan a nih theihna turin hma an la zui a. An hmunhma an kuta la awmlote pawh an kuta hlan tawh turin a luahtute an hriattir tawh nia thudawn a ni bawk.
UPC (NEI) Executive Board chuan an kohhran chhuahsana pawl danga awm tawh te leh Mizoram UPC te chu an kohhrana kir leh vek turin an sawm a. Kumin December thla ral hmaa kir leh te chu rawngbawlnaa an dinhmun pangngai ah theuh an lo kuangkuah leh dawn niin an sawi bawk a ni.