European football thuneitu UEFA chuan Russia chu Ukraine a run avangin Euro 2024 qualification-ah a telh ve dawn lo tih a sawichiang.
Kumin February thla a Russia in Ukraine a run atangin an ram team mai bakah an ram club-te chu UEFA leh FIFA hnuaia inelna engahmah tel phal an ni lo tawh.
Euro 2024 hi Germany in a thleng dawn a. October 9 hian Frankfurt-ah qualifying draw neih a ni anga, inkhel turte pawh an ni ang.
Russia hian an chunga hremna an kenkawh hi Court of Arbitration for Sport (CAS) hnenah ngaihtuah nawn turin an thlen tawh a. July thla khan he ‘appeal’ hi hnawl a ni tawh.
UEFA Executive Commitee chuan kumin February 28 khan Russia leh Russia team te hi hrem turin thutlukna a siam a. Court of Arbitration for Sport chuan July 15 khan he thutlukna hi a sut loh tur thu a tichiang bawk.
UEFA chuan thuchhuah siamin he hremna avang hain Russia chu UEFA European Football Championship 2022-24 qualifying draw-ah a tel dawn lo tih an sawi.
Russia hi kumtawp a Qatar a 2022 World Cup khelh turah pawh hrem an ni tawh a, March thla khan qualifying play-off khel tur an nihlaiin paih an ni.
An mipa team chauh ni lovin hmeichhe team pawh hrem an ni tel a. Kumin nipui a hmeichhe European Championship atangin paih an ni a, an aiah Portugal telh an ni tawh.
Club football lamah pawh tun season UEFA Champions League, UEFA Europa League leh UEFA Europa Conference League-ah Russia club-te telh an ni lo vek a. Hei chauh hi ni lovin UEFA chuan a lo thawhpui reng tawh Russia energy company Gazprom in a sponsor-na chu an titawp nghal.
Kumin UEFA Champions League final pawh khan Russia a thlen tur a ni a, mahse heng thil thleng avang hian St. Petersburg atangin Paris-ah final inkhel hi sawn a ni tawh.