Japanese Formula 1 driver Yuki Tsunoda chuan motor intlansiakna lianah a season thumna a hmang dawn a. Nakkumah Alpha Tauri car a la khalh dawn.
Kum 22 mi hi a hmalam chungchangah tunhnaiah zawhna a tam hle a. Uluk taka a contract neihtu Red Bull leh a team ten an buk hnuah season thar a intlansiak leh turin thutlukna an siam.
Alpha Tauri team principal Franz Tost chuan, “Yuki hi driver talent neitha tak, tun season a hmasawnna lian tak nei a ni a. Tunhnaia a tlanchak theihna a lantir hian nasa takin a inzir tih a nemnghet. Hei vang hian F1-ah inel chhunzawm zel hi a phu tih a lang.” a ti.
Alpha Tauri hi Red Bull Racing hnuaia awm niin team hrang hlak an ni chungin Red Bull driver development programme a tel ang a ngaih an ni a. Red Bull hnuaia driver beiseiawmte inchherhriamna atan an hmang thin.
Tost chuan, “F1-ah hian thil kalhmang engkim bel turin kum thum tal driver in a mamawh thin. Chuvangin Yuki hi hun pek a ni tur hi kan lawm hle.” a ti bawk.
Alpha Tauri a driver turte chungchangah hian Red Bull motorsport adviser Helmut Marko a inrawlh thuk hle a. Team lamin thu an nei thui lo.
Pa tawng tam ve thin tak Marko hian tunhnaiah Tsunoda chu driver tha nimahsela hma a sawn a ngai tiin a lo sawisel tawh a. Hei hian a hma hun chungchang zawhna a ti tam zual.
“Italy a ka pem hnuah team pumpui nen uluk zawkin kan thawkdun thei a. He team-ah hian ka tel thuk tawh a, ka chhunzawm zel thei tur hi ka lawm.” tiin Tsunoda chuan a sawi.