Aizawl: Mizorama cham mek, sorkar laipuia AYUSH leh Women & Child Development changtu, Union Minister of State Dr. Munjpara Mahendrabhai chuan Mizoram mipuiin AYUSH thiamnate hriselna atana an hmang tangkai mek chu lawmawm a tih thu a sawi.
Ruahman lawk dana Inrinnia haw leh tur, Dr. Mahendrabhai chu nimin chhun khan Lengpui Aiport-ah tumin chawhnuah Aijal Club-ah Mizorama AYUSH Directorate leh Women & Child Development Department hotute nen department hmalaknate thlirhoin an thukhawm.
Union minister chuan a enkawl ministry pahnih – AYUSH leh Women & Child Development chuan ram pumah hmalakna tha takin an kalpui mek tih a sawi a, Mizoramah pawh mipuiin AYUSH lam thiamna an hriselna atan an hmang tangkai mek chu lawmawm a tih thu a sawi.
Ayurveda phei chu hmasanga atangin India-in hriselna chungchanga system of medicine a neih leh kalpui a ni a, mipuiin an hlawkpuiin an tangkaipui hle tih a sawi Dr. Mahendrabhai chuan sawiin, “Chuvangin, AYUSH hi tun aia mipuiten an chhawr tangkai theih nan AYUSH awareness-ah hma lak leh zual a ngai,” a ti.
He thutkhawma Health Principal Secretary Esther Lalruatkimi’n a tar lan danin Mizoram pumah hian a nghet leh nghet lovin AYUSH doctor 89 leh support staff 99 thawk mek an awm a, Mizoram hian Thenzawlah khum 50 awmna AYUSH damdawi in a neih bakah district tam zawka khum 10 awmna AYUSH inenkawlna a nei tawh.
Mizoram pumah AYUSH Health & Wellness Centre 38 neih tumin hma lak mek a ni, heng zinga a tam zawk chu hawn a ni tawh a ni tih leh Aizawlah Rs. nuai 1,500 senga sak tur, khum 50 awmna AYUSH damdawi in leh Saitualah Rs. nuai 750 senga sak tur, khum 10 awmna AYUSH damdawi inte chu sanction a ni tawh tih prinpical secretary hian a tar lang bawk.
Social Welfare & Tribal Affairs Secretary Arun Mishra-a’n WCD hmalakna a tar lan danin, ICDS hnuaiah aganwadi centre 2,244 a awm mek a, Poshan 2.0, naupang kum thum hnuai lam leh nu naupai leh nau pawmte chaw tha pekna scheme hnuaia beneficiary 1,20,586 an nei mek a, hengte hi chaw tha, thil hrang hrang chi 13 kum khata ni 300 an pe thin.