Director General of Police Devesh Chandra Srivastva-a’n Kolasib district police-te chu Inner Line Permit bawhchhia an manin a sponsor-tute pawh hrem tel thin turin a chah.
Mizoram Police DGP hian nimin khan Kolasib district tlawhin, Kolasib SP pisaa police officer-te a kawmnaah ILP chungchang hi a sawi a, “ILP-te pawh online-a pek chhuah a ni tawh a, ILP bawhchhia man an awm a nih chuan a bawhchhetu chauh ni lovin, a sponsor-tu pawh hrem tel thin rawh u,” a ti.
State pawn atanga ruihhlo chi hrang hrang Kolasib district kaltlanga lakluh nia ngaih hmun danga man awm leh thin chu ngaimawhawm a tih thu sawiin, “Gate-ah tan kan lak a ngai. Duty-te pawh kan inthlak fo a ngai a ni,” tiin a sawi.
DGP chuan Mizoram chu case chargesheet siamah India ramah a titha ber a ni tih a sawi a, hetihlai hian thil tisual man tawh, man nawn leh ngai pawh a tam ber a nih thu a sawi.
“Delhi-ah chuan dan bawhchhe nawn hi jail tang chhuak zingah 7% chauh a nih laiin Mizoramah 33% a ni,” tiin, mihring siam thatna lamah tan a ngai a; NGO leh Kohhrante nen pawh thawhhona a that a ngai tih a sawi a ni.
Kolasib district police-te chuan DGP hnenah hian Kolasib district chhunga police station hrang hrang mamawhte an lo thlen a, hengte hi a theih anga bawhzui a nih tur thu a sawi.
DGP hian Kolasib Police Station a tlawh bawk a, tlaiah Vairengteah chhukin Bilkhawthlir Out Post a tlawh thla a, Vairengte Checkgate a tlawh bawk a; nizan khan CIJW School, Vairengteah riakin vawiinah Aizawlah a let leh ang.