Damdawi inah emaw private clinic-ah emaw doctor rawn tura kan kal hian, ho tê anga lang pawimawh si kan hriat tur a awm ve a. I nat dân dik takin sawi la, inentir tura i luh hmain i sawi dân tur ngaihtuah lâwk thin ang che.
Mihring hi kan inang lo khawp mai! Thenkhat tawng mawh êm êm mai, zawhna zawh pawha an natnate leh nat dân te sawi tha duh tlat lo an awm a.
Thenkhat thung chu an engkim mai a na ta emaw tih mai turin na an ngahin an sawi uar thiam êm êm mai a. Thil tul lêm lote an sawi tel fo thin. Felfai takin kan nat dån dik tak sawi mai tur a ni.
Kan inentirin, kan inentir tawhna lehkha hlui zawng zawng ken tel thin tur a ni a; a theih phei chuan kan damdawi ei lai pawh ken tel a pawi lo.
Tam takin ken nachang an hre lo fo mai. Doctor-in i lehkha hlui a en khan i lo nat tawh dân tlangpui leh damdawi i lo ei tawh te a hre thei ang a. Enkawl zel dân tur che a hre thiam awlsam dawn a ni. Doctor i pan ngai tho mah la a pawimawh tho. Doctor khan mi dang tam tak a en ve a, a damdawi chawh tawh che a hre lo fo vang
Zawh kher ngai lovin natna benvawn dang, zunthlum, thisen sang, kal natna, thin natna etc i neih chuan sawi vek tur a ni. Hmeichhe naupai chuan nau an pai tih sawi bawk tur a ni. I vun i entir khan, nau i pai thu leh natna dang i neih te i sawi kha a pawimawh êm êm tho a ni.
Thenkhat hian doctor dang hnena an inentir thu sawi nachang an hre lo fo.
Entir nan: Vun inentir khan a mit ha emaw a entir fo thin a. Natnate hi a hrang hrang angin chhuak mah se, a inkungkaih fo thin.
Tin, i doctor inentirin, doctor dangin damdawi a chawh che kha a hriat loh chuan damdawi ngai tho, hming dang siin a chawh thei che a; damdawi double dose i ei dawn tihna a ni a, taksa tan a pawi thei a ni.
Mize hrang hrang nei kan awm angin, doctor tawng duh leh tawng tlem, tawng rang leh tawng muang, tawngkam thlum leh thlum vak lo, tawngkam ném leh tawngkam chhum bul deuh te etc. an awm ve a. An biak that huam loh vang che khan an sual tihna a ni lo a nia.
Doctor, mahni doctor puite sawisel vak vak ching chu pan lo mai rawh.
Khawpuiah phei chuan doctor pan tur an tam a, duh i thlang thei alawm.
Mizote hi thil inti hre tak hnam kan ni a, natna chungchangah pawh, doctor aia hre zawka inngai tlat te an awm a. Mi thil sawi nazawng ring suh.
Tin, i thenawm pa emaw i thenawm nu emawin a ngeih kha i ngeih ve dawn tihna a ni lo, mihring kan inang lo va, damdawi in kan taksaa hna a thawh dan pawh a inang diak diak vek kher lo.
Thangkura tawngkam takin, a ‘tre a trening chhuakte pawn an hriat loh chu, a zir ve lo phei chuan an hriat bikna chhan tur a awm lo.’
Doctor hrang hrang pan lâwr duah hi dam hmâna a ni kher lo. Vawi khat inentirnaa i dam nghal lo a nih pawhin dawhtheihna neih ve a pawimawh fo.
Natna tlanglawn, hritlang angah te hian specialist kher räwn a tul lêm lo. “Specialist” kher i tih tlat pawhin a tha a ni mai a, i thu thu a ni.
“Ka natna a hre thei, min chawh fuh,” tih ringawt hi doctor thiam tehna a ni lo. Natna inang reng pawh dam hma leh dam har a awm.
Entir nan: Malaria Pf hi hriat chhuah hmâ a, enkawl hma chuan a dam har lo; enkawl tlai a, thluak leh kal a khawih chhiat hman erawh chuan a dam har a, thihna hial pawh a thleng thei a ni. Miin doctor a lo zir chhuah hian, engkim thiam sain a lo chhuak bik lo, mahni inzir zel a ngai.
Doctor zir chhuak pawh, mahni inzir zel tum lo va, inthlahdah taka a awm mai mai chuan a hriatna leh thiamna a bil tulh tulh mai ang.
Khawvelah hmeltha ber leh hmelchhe ber a awm theih loh ang bawkin, doctor thiam ber leh doctor thiam lo ber a awm theih loh.
Mahni hnaa tui, thahnemngai taka missionary rilru pua thawk leh, mahni inzir zel peih te hi doctor thiam an ni mai. Hei hi eng line ah pawh a dik vek; doctor hna hi a tui lo tan chuan hna ninawm tak a nih ka ring. Pa pakhat chuan, “Doctor-te hi chu Lal Isua rawngbawlna chhunzawmtu in ni a, in hna hi missionary hna a nia….” a ti a, ka pawm chiah lêm lo!
Eng hna pawh hi missionary hnaah ngai vek ila, missionary rilru puin thawk vek ila, a pawimawh ber mai.
Source: Gilead Thinghnai, Dr. Lalkhawngaihsanga