Bihar chu Left Wing Extremism awm lohna hmun a ni ta niin Central Reserve Police Force (CRPF) Director General Kuldiep Singh chuan Nilaini khan a sawi.
Singh chuan, “Maosist-te hi khawimaw laiah chuan an lo la awm thei a; mahse, tun hmaa an lo thunun thin khawchhak lam state-ah hian an tan hmun a awm tawh lo,” a ti.
Left Wing Extremism laka beihpui an thlaka an hlawhtlinna chan tar langa thuthar lakhawmtute a kawmnaah Singh chuan, “Bihar leh Jharkhand-ah hetiang tan hmun a awm lo,” a ti.
Union Home Minister Amit Shah chuan a hma lawkin Twitter-ah venhim hna thawktuten Naxal laka hlawhtlinna hi a tar lang bawk a. “Home ministry-in firfiaka chetna leh Left-wing extremism (LWE) awm lohna tura thil a kalpui chu chhunzawm zel a ni ang,” tiin Shah hian Hindi-in a tar lang.
“Bihar hi Naxal awm lohna tiin kan sawi thei ta a. Hmun thenkhatah lo awmna lai chu an nei thei a; mahse, an lo awp thin Bihar-ah hmun an nei tawh lo. Bihar leh Jharkhand-ah hian sipaiten thlen theih loh lai hmun a nei lo,” tiin CRPF DG hian a sawi tih news agency ANI-in a tar lang.
Singh chuan April thla atanga special operation pathum – ‘Operation Octopus’, ‘Operation Thunderstorm’ leh ‘Operation Bulbul’ an thlak hmangin venhim hna thawktute chuan Jharkhand-Chhattisgarh ramria helho thunun thin, Burha Pahad chu an tizalen tawh tih a sawi bawk.
“Burha Pahad hi kum 32 liam ta chhung Naxal-ten an thunun a ni a. Operation Octopus hnuaiah ni hnih liam ta khan sipai thuthmun dah a ni a, sipaite hi helicopter hmanga thiar luh an ni,” a ti.
Singh chuan LWE hi an tlem chak hle tih a sawi a. “77% zetin chetna an nei tlem tawh a. Kum 2009 kha an chet nasat ber tum niin vawi 2,258 a thleng a, tunah erawh chuan vawi 509 chiah chetna an nei tawh a. An chetna avanga thi zat pawh 85% zetin a tlahniam tawh bawk,” a ti.