NHIDCL General Manager SG. Dwivedy-a’n Aizawl – Tuipang kawng (km 380) siam hna an thawh mek chu nakumah zawh an inbeisei thu a sawi.
Hnahthial district-a sorkar laipui hmalaknaa hmasawnna hnathawh hrang hrang thirhova district development coordination & monitoring committee, an Chairman Lok Sabha MP C. Lalrosanga hova Hnahthiala thutkhawmah he thu hi NHIDCL General Manager chuan a sawi a. COVID19 avangte, fur ruahtui tam avangte, Electric hrui leh PHE pipe line seng felloh thenkhat avangtein hna an thawk chak thei lo nia sawiin, mimal In, compensation lak vek tawhna la senghawi duhlo an awm niin a sawi bawk.
Thutkhawm kaihhruaitu Lok Sabha MP C Lalrosanga chuan Mizoram chhung hmun hrang hranga kawng siam hnathawk mektu NHIDCL te chu tha taka hnathawk turin a chah a. Kawng laih avanga lirthei tana tlan hrehawm khawpa khuar leh pawng sang deuhte siamtha nghal zel turin a chah.
Nikum October atanga thla liamta August 2022 thlengin PWD Hnahthial sub-division huamchhungah PMGSY sum Rs. 32,71,57,592.06 hmangin kawng km 37.75 a thui siam a nih thu he thutkhawmah hian PWD hotu ten an sawi a. SPA sum Rs.6,53,06,000 senga kawng km 15.420 a thui siam mek a nih thu an sawi bawk.