North Korea chuan Russia hnenah ralthuam a hralh lo va, a hralh dawn bawk lo tih a sawi.
Tun hnaiah US chuan Moscow hian ralthuama an tlakchham thenkhatte phuhru turin Pyongyang atangin a chaw lut niin a lo sawi tawh a ni.
US thuneitute chuan Russia hian North Korea atanga rocket leh laipuimu lei tumin an inbuatsaih mek niin an sawi a ni.
Iranian ralthuam pawh lei a tum niin an sawi a, hei hian khawthlang ramten Ukraine a rûn avanga an hrekna chu a tuar hle tih a tilang niin an sawi bawk.
Moscow erawh chuan ram dang atanga ralthuam chawk luh tum anga puh a nih lai hian a pha thung.
Anni ram hnih hi ralthuam an inpe tawn a nih chuan United Nations-in a phalsak loh mek an bawhchhia tihna a ni dawn a ni.
Ningani khan North Korean sorkar chanchinbu, KCNA chuan an ram defence ministry hotu pakhat, a hming tar lan loh chuan, “Tun hma pawhin Russia hnenah ralthuam leh puak thei kan la thawn ngai lo va, thawn tumna pawh a awm lo,” tiin a sawi niin an tar lang.
US leh a thawhpui ram sipaite chuan politics leh sipai lama thangthat lak nan thu dik lo an thehdarh niin a sawi bawk.
September thla tir khan US state department thupuangtu chuan Russia-in North Korea thil a lei zingah hian ‘silaimu maktaduai chuang, rocket leh laipuimu’ pawh a tel niin a sawi.
Mahse, a hnu lawkah National Security Council thupuangtu, John Kirby chuan he thu hi hnial lehin ralthuam chu an la inlei fel rih lo niin a sawi a, Ukraine indonaah pawh heng ralthuam lei nia sawite hi hman a ni tih finfiahna a awm lo niin a sawi bawk.
North Korea hian Russian-te duan ralthuam an neihte hi Soviet hun laia mite kha a ni tawh a; mahse, an missile-te chu Russian hman mek nen pawh a inang.
North Korea nen an indawr tih an sawi hnu lawkah US thuneitute chuan Iranian siam drone pawh Russia a thleng niin an sawi zui a, Russian drone operator-te pawh a hman dan zirin Iran-ah an zin niin an sawi a; mahse, Iran chuan hei hi a pha.
Russia-in February thla tawp atanga Ukraine a rûnnaah hian ralthuam changkang, cruise missile-te pawh hmang mah se sipai lamah a tuar hle a. Ukrainian sipaiten tun hnaiah khawthlang ramte ralthuam ang an lek theih tak bawk avangin nasa takin an inchân a ni.