Tennis legend Roger Federer chuan tun thla a Laver Cup a khelh zawh hnuah professional tennis a chawlhsan tawh tur thu a sawi a. Inrinni zingah a inkhel hnuhnung ber ni turin court chhung a lut dawn.
Federer hian Laver Cup doubles inelnaah a elpui hlun Rafael Nadal nen inkawpin Team Europe tan an khel anga, an hmaah Team World tana khel tur Jack Sock leh Frances Tiafoe te an ding ang.
Laver Cup doubles inkhel hi London a O2 Arena-ah khelh a ni dawn.
A hun a thleng dawn ta
Grand Slam title vawi 20 la tawh Federer hian team inelna Laver Cup zawhah hian a chawl dawn tih a lo sawi tawh a. He inelna hi vawiin atangin an khel tan ang.
Kum 41 mi Swiss superstar hian a khingpui ni fo, a vanglaia amah eltu ber kum 36 mi Nadal nena khelhdun chu a tan thil nuam leh hlimawm tak a ni dawn tih a sawi.
“A boruak ka zo ang em tih ka sawi thei bik miah lova, mahse ka tum ang.”
“Tun tum hi chu a boruak a danglam hle a. Ka khingpui ni lova ka team ami a ni tur hi chu ka lawm.” tiin a sawi.
Nadal pawhin a elpui hlun tak nena an khel leh tur chu a lawm thu a sawi a. “Ka tennis zinkawng a player pawimawh ber tih ngam in min chawlhsan tawh dawn. He hun hi a lo thlen meuh chuan boruak a rit khawp ang. Kan han inkhel dun leh tur erawh ka phur tawh a, khelh dun leh theihna hun kan nei hi vannei ka inti hle.” tiin a sawi.
A tawpna a ni tawh
Federer hi a khup na avangin tunhnaiah harsatna neuh neuh a nei reng a. Tun tumah pawh hian singles inelnaah tel a inhuam lo.
Nikum Wimbledon quarter-final ah khan Hubert Hurkacz lakah tlawmin hei hi inelna pangngai a khelh hnuhnun ber a ni.
Laver Cup hi team inelna niin Europe team leh World team a tel turte thlan an ni thin a. Ni thum awh inelna a ni ang.
Singles inelnaah hian Federer-a ai hi Italian mi Matteo Berrettini chuan a khel ve thung ang.
Team Europe captain hi legend Bjorn Bjorg niin Grand Slam title vawi 21 la tawh Novak Djokovic pawh a tel a. Lehlamah Team World captain hi Bjorg-a elpui hlun leh thian John McEnroe a ni ve thung.