Mizoram Chief Minister Zoramthanga chuan Zoram Medical College (ZMC) chu sorkar laipuiin enkawlsak turin a ngen.
New Delhi-a cham mek, chief minister hian Ningani khan Union Health & Family Welfare Minister Mansukh L Mandavuiya chu a pisaah kawmin hriselna kawnga Mizoram mamawh a thlen a. ZMC chungchangah Mizoramin a enkawl dawn chuan a hautak dan te, mi thiamten zirchianna an neih hnua ruahmanna an siamte chu sorkar laipuiah an theh luh tawh thu te a thlen a ni.
Chief Minister Zoramthanga hian India hmarchhak medical college tam tak sorkar laipuiin a chawm ang hian ZMC chu enkawlsak ve turin union minister hnenah thlenin, seat chungchang bakah thil dang hrang hrang ngaihtuah tel ngaite pawh a sawipui.
Union health ministry leh Mizoram health department ten an pawm tlan theih ve ve tur la sawikhawm nise tiin, Union minister chuan Mizoram dinhmun a hriatthiampui thu leh theihtawp a lo chhuahpui tur thu a hrilh.
An inkawmnaah hian Mizoram Cancer Hospital atana khawl leina tur Rs. vaibelchhe 10 bawr vel chu central ministry a\anga puihna dil a nih thu thlen bawkin, Union Minister chuan tihhlawhtlin a nih theih nan theihtawp a lo chhuahpui tur thu chief minister hi a hrilh bawk.
Ningani vek khan Zoramthanga hian President Droupadi Murmu chu Rashtrapai Bhavan-ah kawm nghal bawkin, Mizorama hmalakna pawimawh hrang hrang leh hmachhawp te, a tihhlawhtlinna tura sorkar laipuia ministry hrang hrang hnenah mamawh a thlen te a sawipui a ni.
Hemi ni vek hian Union Home Minister Amit Shah chu a chenna inah Zoramthanga hian kawm bawkin, a hun tak tur la hriat ni lo mah se India ramin zalenna a sual chhuah kum 75 champhaphak lawmna ni pah fawmin Zokhawsanga Assam Rifles headquarters chu hawng turin a sawm bawk a ni.