Belgium midfielder Kevin de Bruyne chuan khawvela midfielder tha ber zing ami a nihna a lantir a. Wales lakah a thiam thil lantir in 2-1 in a ram a chak pui.
Brussels a inkhelah Wales an tlawm avangin Nations League a an group atangin tla ang tluk an ni tawh.
King Baudouin Stadium a inkhelah De Bruyne hian minute 10-naah an goal hmahruai chu penalty area hmawr atangin mawi takin a pet lut a. Hemi hnuah goal goal ban a pet per leh bawk.
First half-ah tho Belgium goal hnihnaah De Bruyne bawk a langsar a. Michy Batshuayi goal khung tur a siamsak tha hle.
Chawlhlawk hma in Belgium in inkhel an thunun hneh hle a. Goal hlauhawm tam tak an siam. Penalty an hlawhchhuah chu VAR hmanga sut leh a ni a. Wales goalkeeper Wayne Hennessey a kheltha bawk.
Second half-ah erawh Wales an inremtha a, a hma aia khauh zawkin an inveng. Hei hian awmzia neiin Belgium an ven that bakah anmahni zawk an hlauhawm let ve zauh zauh thin.
A rah seng ta rengin Brennan Johnson-a ball cross chu Kieffer Moore-a’n a tauh lut a. Wales in goal khat an nei ve.
Belgium hian a zawnin match 49 goal an khung tawh a. Kum 2018 World Cup semi-final hnuah an inkhelh apiangin goal an la khung.
He inkhelah hian ram pahnihten an player chhuanvawr ni thin pahnihte an khelhtir a. Wales in Gareth Bale chu second half-ah luhtirin Belgium in sawisel hlawh thin tak playmaker Eden Hazard chu darkar khat inkhelhna hun an pe ve bawk.
Inkhel zawh lam
De Bruyne chuan, “Chak kan phu zawk a, first half kan thunun hle. Chance pawh kan ngah. Man to man a an khelh avang khan kan tan hmunawl a tam phah.”
“Second half erawh kan kheltha lova, an tawm bakah an tangrual a, kan dawhtheih a ngai hle.” tiin inkhel a thlirlet.
Wales goal khungtu Moore chuan, “Inkhel hautak tak a ni dawn sa tih kan hria a, zaninah pawh an khel tha hle. Tlawm kan duh lo chungin zanin atangin a tha lai kan la anga, Pathianni inkhel tur atan kan inpeih ang.” tiin a sawi.
Holland an chak
Group A4 lamah Netherlands in hma hruai turin hnehna pawimawh an chang a. 2-0 in Poland an hneh.
Warsaw a PGE Narodowy a inkhelah Dutch winger ngaihven hlawh Cody Gakpo chuan an goal hmahruai a khung a. Second half-ah Steven Bergwijn chuan an goal hnihna a khung.
Tun tum Nations League a la tlawm miah lo Dutch team hi match nga atanga vawi li an chakna a ni a. Pathianni zana Belgium nen an inkhelh hunah nakkum a Nations League finals a tling turin draw bak an mamawh tawh lo.
Netherlands coach Louis van Gaal chuan he inkhelah hian kum 38 mi Ajax Amsterdam goalkeeper Remko Pasveer chu a inkhelh tir a. An ram chanchin a a vawikhatna atana inkhel thei zinga upa ber dawttu a ni.