An Arab-pui ram dangin an hmelma lian ber, Israel an rem chu inzah lohnaa puhin Palestine chuan Arab League chairman an nihna chu an kalsan tih an foreign minister chuan a sawi.
UAE leh Bahrain ram chuan Israel hi Washington-ah inremna an ziahpui a, hei hi Palestinian-te chuan Israeli-ten an luah meka ram hran neih tuma an beih meknaah an tana pawi theia ngaiin an duh lo hle.
Tun thla tir lamah pawh khan Palestinian-te hian Arab League chu Israel nena inremna neihte dema duh lo turin a ngen a, a lo hlawhchham tawh.
Palestine hi thla ruk chhung Arab League thutkhawma kaihruaitu dinhmun luahtu tur a ni a; mahse, Foreign Minister Riyad al-Maliki chuan an luah chin, West Bank-a Ramallah-a thuthar lakhawmtute a kawmnaah nihna hi an chelh dawn loh thu a sawi.
“Palestine chuan League-a council of foreign ministers kaihhruai hna kan chan tur chu kan hnawl a. Arab-ten ram dang rema thil an kalpui danah hian engmah inzah tawnna a awm chuang lo tih a lang,” tiin Maliki hian a sawi.
UAE leh Bahrain ram hming lam chhuak lovin, Gulf Arab ramte chuan Iran do zawngin Israel lam an tang niin Maliki chuan a sawi a. Arab League Secretary-General Ahmed Aboul Gheit hnenah an thutlukna siam chu an thlen dawn tih a sawi bawk.