AIZAWL: Deputy Chief Minister Tawnluia chuan nimin khan Sailam Water Supply Scheme a hawng a, thingtlang in tina tui thianghlim pek chhuahna tur, JJ scheme bawhzui kawngah Mizoramin hma a lak that thu leh he scheme hi Mizoramah chuan kum 2023-ah zawh theih beisei a nih thu a sawi.
Water Supply Scheme hawnna inkhawm, Sailam Hall-a neih hi PHE Department Secretary Er.Lalmuanzova’n a kaihruai a, PHE changtu, deputy chief minister chuan JJM scheme chu India ram pumah kum 2024-ah zawh tura tih a nih thu sawiin, “Mizoramah chuan hma kan lak chak em avangin 2023 kum tawpah zawh theih kan inbeisei,” a ti.
Sailam khuain tui an dawn dan sawi zawmin, thingtlang khaw zinga chhum lo chat lo, darkar 24 chhunga tui hnianghnar taka dawng thei khua an ni a, sorkar laipui pawhin a chhuang a, khaw entawntlakah a puang tih a sawi.
Dy CM chuan he khuaah hian mi tinin ni khatah litre 62 zel tui an dawng thei a, kham khawp mai ni lo, hman sen loh an dawng tih sawiin, Sailam khaw mipuite chu chet thianghlim kawngah te, khaw dai tihfai, faina leh thianghlimna kawngah tan la leh zual tura chahin, Mizorama khaw fai leh thianghlim ber nih tum turin a fuih.
Bialtu MLA Prof F Lalnunmawia pawhin thu sawiin Sailam Water Supply Scheme hawn a ni ta chu lawmawm a tih thu a sawi a, “JJM-in a tum chu a enkawl zui hna hi sorkar kuta dah loin khaw mipui kuta hlan chhawn a ni,” tiin, scheme tihlawhtling hmasa thei khuaa Sailam an tang chu a chhuanawm a, Mizoram khaw dang leh India rama khaw dang tan pawh entawntlak an nih thu a sawi.
Sailam khaw chawmtu tur, Sailam Water Supply Scheme hi scheme pahnih hmanga thawh a ni a. Lengleh lui atanga khaw chhunga tui pump luhna hi NABARD sum hmanga thawh a ni a, nizung chakna, Solar Pump hmanga lak a ni.
He Solar Water Pump hi Lorentz company siam a ni a, solar module 51 a nei a, ni khatah litre 60,000 a pump thei a. NABARD sum hmanga hmalaknaah hian tui connection pek chhuah a ni lo a, public point 50 atanga tui pek chhuah thin niin August 27, 2019 khan thawh zawh a ni.
Chhung tin hnena tui connection pek hi Jal Jeevan Mission hnuaiah Sailam khuaa chhungkaw 167 hnenah pek a ni a, tui hi ni tin darkar 24 chhung, chhun zan zawma herh haw theih a ni a; JJM hmalakna ena sorkar laipui atanga kalten JJM hmanga tui pek kawnga khaw entawntlak, model village-ah an ngai a ni.