Health Minister Dr R Lalthangliana chuan nimin khan khum 100 awmna tur, Kolasib District Hospital thar sakna tur lung a phum.
Dr R Lalthangliana chuan Kolasib district chu state luhkapui a nih angin district hospital pantu pawh an thathnem thu a sawi a, khum 100 awmna hospital thar sakna turah thawhhona boruak tha tak a awm a duh thu a sawi.
Hri leng vanglaia ram pawn atanga tangkhang haw buaipui kawngah te, ramria hri vei endik hna kalpui kawngah te leh damlo enkawl kawngah Kolasib district-a sorkar hnathawkte leh mipui thawhhona fakawm a tih thu minister chuan a sawi bawk.
Koalsib bialtu MLA K.Lalrinliana, Minister of State pawhin thu sawiin Kolasib District Hospital chu kum 1896 khan khum pali awmin bul tan a nih dan te, 1978-ah khum 30 awmin kum 1998 khan khum 60 awm theihnaah hlan kai a nih leh dan te a sawi a; Aizawl, Lunglei leh Siaha dawtah Kolasib district-in khum 100 awmna district hospital an nei tur chu lawmawm a tih thu sawiin health clinic thar thahnem tak sakna turin hmalak mek a nih thu a sawi bawk.
Khum 100 awm theihna hospital hi NESIDS hnuaia Rs. nuai 1,859.87 hmanga sak tur a ni a, hnathawh hun chhung tur hi thla 24 a ni.
Motor hunna tur basement, ground Floor bakah chhawng thum a awm dawn a, mi 13 chuan theihna lift dah a ni dawn bawk a. A sak hna hi M/S VRC Constructions (I) Pvt Ltd, New Delhi-in an thawk dawn a ni.