Sri Lanka-a zawlnei (shaman) hriat hlawh tak, an rama COVID-19 hripui leng chu a malsawm tui hmanga enkawl dam theih leh tihreh theih nia sawitu chu hri leng vang hian a thi niin a chhungten an sawi.
Kum 48 mi, Eliyantha White hian an rama infiammi hriat hlawh tak tak bakah politician lawk tak takte pawh a lo enkawl tawh a, heng zingah hian prime minister pawh a tel.
November khan Sri Lanka leh an thenawm, India-a hripui leng chu luiah a malsawm tawh tuibela tui thehin a reh dawn niin a lo sawi tawh.
Health Minister Pavithra Wanniarachchi pawhin tuia inenkawl hi a fak hle a; mahse, thla hnih hnu lekah amah ngei pawhin kaiin intensive care unit-a luh ngai hialin a awm.
A hnuah a ministry chanpual a chân zui a; mahse, cabinet-ah erawh a la tel zui.
White-a hi khawvelin an ngaihven tanna chu kum 2010-a Indian cricketer Sachin Tendulkar-an vantlang hriata a enkawl avanga lawm thu a hrilh atang khan a ni a. A khup hliam enkawlsakin khawvela a hmasa ber atan South Africa laka one-day international double century a siamna kawngah a pui hle niin a sawi.
Kum 2010-a AFP news agency-in an kawm tum khan White-a hian ‘thiltihtheihna bik’ hi kum 12 mi a nih atangin a nei tawh niin a insawi.
Indian cricket star dang, Gautam Gambhir leh Ashish Nehra te pawh an hliam a lo enkawl tawh.
A chhungte chuan COVID-19 vaccine pawh a la duh lo niin an sawi.
A ruang hi Colombo-a thlanmual lian berah Ningani khan dan zam zawm chunga phum a ni.
A enkawl tawh zinga mi, Prime Minister Mahinda Rajapaksa chuan White-a chungchang hi Twitter-ah tar langin, “A sulhnu chu dam chhungin a awm reng ang a, natna tam tak a tawh leh khawih hmangin a tidam a ni,” a ti.
Covid-19 chungchanga a ngaih dan hi doctor chuan duh lovin Ayurveda physician-te pawhin an pawmpui lo va; mahse, amah hian kum 3,000 lian tawha Indian medical tradition angin a enkawl niin a sawi.
Sri Lanka-ah hian coronavirus avanga thi hi mi 12,000 chuang ni tawhin mi nuai nga chuangin an kai tawh.
Doctor-te chuan a tak takah chuan thi hi an chhinchhiah let a nih an ring a, thuneitute chuan damdawi in leh ruang dahnaa ruang tam lutuk tihthawl nan a hlawma invui an kalpui thin.