Aizawl: Federation of Indian Chambers of Commerce & Industry (FICCI) chuan India rama media kaltlanga smuggling leh counterfeit (thil lem) dona kawnga hna thawk tha, Henry L. Khojol, Editorial Consultant (Aizawl Centre) ni lak mek chu ‘FICCI CASCADE Awards for Excellence in Journalistic Reporting on Smuggling and Counterfeiting Issues’ a hlan.
September 23, 2022 khan FICCI CASCADE inkhawmpui vawi 8-na, Hotel Sangri-La Eros, New Delhi-ah chawimawina hi hlan a ni.
Kum 40 mi, Henry L. Khojol hi Mizoram Journalists’ Association (MJA) member a ni a, Mizoram sorkar hriatpui, Accredited Journalist a ni bawk.
India rama business organisation zinga upa ber leh lian ber, FICCI hian smuggling leh counterfeit (thil lem)-in India economy a tihchhiat mek dona peng pakhat, ‘Committee Against Smuggling and Counterfeiting Activities Destroying Economy (CASCADE)’ chu kum 2011 khan a din a, smuggling leh counterfeit dona kawnga ti tha bik enforcement officer, journalist te bakah zirlai naupangte hnenah chawimawina a hlan thin a ni.
Kumin hian India-ah he chawimawina dawng turin print leh electronic media organisation hrang hrang atangin journalist paruk thlan an ni a. Henry L. Khojol hnenah lawmman pakhatna hlan niin, pahnihna chu Ahmed Ali, Times of India, Mumbai a ni a, Trideep Lahkar, PTI, Guwahati-te chuan pathumna lawmman a dawng thung.