Aizawl : Mizoram Pradesh Congress Committee (MPCC) chuan Primary School leh Middle School (Elementary stage) naupangte’n a thlawna chaw chhun an dawn thin Mid Day Meal scheme hnuaia chaw ei thleng leh bungraw dang supply chhia chhuichiang turin MNF sorkar an phut.
An thuchhuahah MPCC hian, Mid Day Meal scheme hnuaiah chaw ei thleng, fianpui leh dekchi liante tun hnaiah supply a nih thu an sawi a. He’ng bungraw hrang hrangte hi semchhuah mai theih turin district hrang hrangah thawn kual niin, zirlai naupang chaw chhun eina tur bungruate hi a nih tur ang aia te leh quality chhia a nih avangin District Project Coordinator Office-te chuan school-ah an sem chhuak ngam lo niin an tar lang.
MPCC hian zirlai naupangte’n a thlawna chaw chhun an ei theihna tur leh zel sum siam nana hmanga a nih ang tur ni lo bungrua supply a ni chu pawi an tih thu an sawi a. “Bungraw chhe tak supply tu hi NABARD loan hmanga school sak that hna tam tak thawktu, Education Minister thian hnai tak, a consultancy Firm hman thiam Allied Concern an ni,” tiin, bungraw chhia leh a nih tur ang ni pha lote hi a rang thei ang bera bungraw dik leh tha zawka thlak thuai tur leh thil dik lo titute dan anga hrem ngei turin sorkar an phut thu an tar lang bawk.