Eknath Shinde-a kaihhruai lam Shiv Sena chuan Zirtawpni khan court-ah Uddhav Thckeray-a kaihhruai Shiv Sena an hneh lo.
Bombay High Court chuan Thckeray-a lam hi Mumbai khawpuia hmun lar tak, Shivaji Park-a Dussehra rally buatsaih a phalsak ta zawk a. Shinde-a kaihhruai lamin petition thehluta rally buatsaih phal leh phal lovah thutlukna la siam lo tura a ngenna chu a hnawl a ni.
A hmain Brihanmumbai Municipal Corporation chuan Thackeray-a leh Shinde-a pawl lamten Dussehra rally buatsaih an tum hi Mumbai Police-in dan leh thupek kenkawh lamah harsatna a awm thei nia an hriat avangin an lo phalsak lo ve ve tawh.
Thackeray-a lam hian BMC thutlukna chu khingin Shinde-a pawl lam hi an inrawlh zui ve bawk a ni.
Shinde-a lama tel, Dadar bialtu MLA Sada Sarvankar chuan Thackeray-a kaihhruai lam chet dan chu a dik lo va, Shiv Sena dik tak zawk nih tuma hma an lakna mai niin a sawi.
Thackeray-a pawlte chuan court thutlukna hi an lawm hle a, court rorelna rintlakzia a lang leh ta niin an sawi a. Party thupuangtu, Manisha Kayande chuan kumina rally an huaihawt tur chu a lian hle dawn tih a sawi bawk.
A hmaa rally huaihawt phalsak lotu, BMC tan pawh nawrna a na sauh dawn niin a sawi bawk.