- F. Vanlalrochana
KHAWVELA MI HAUSA BER ELON MUSK-A TITI
“Nikhatah darkar 10 lehkhabu ka chhiar thin”. Hei hi, Mizoram chhunga khaw pakhata an khaw whats app groupah mi pakhatin a sawi chhawng a, Elon Musk-a titi hi. Chuta groupa awm ve, an khaw pa pakhat chuan a awih lo! Miin nikhatah lehkhabu darkar 10 an chhiar peih a ring lo. Hei hi Elon Musk-a leh musk-loa te an danglam thinna chu a ni. Khawvela mi langsar leh ding chhhuak, thil thar hmuchhuaka, ngaihtuah chhuak thinte hian lehkhabu an chhiar a. Ngaihtuahna an seng a, ngaihtuah dan thar an hmu chhuak a. Khawvelah danglamna an thlen a. A hausak te pawh an hausak phah thin.
Engemaw lai atanga Jeff Bezos-a rawn leh pela, Khawvela mi hausa ber dinhmun rawn luahtu ve hialtu, Elon Musk-a, thil thar hmuchhuaka, siam chhuaka, hralh chhawng lehtu hi lehkhabu chhiar nasa leh chhiar zau, chhiar tam em em mai a ni a. Amah chawi liantu an zawh pawhin, “Lehkhabu…A dawtah ka nu leh pate” ti ngata chhangtu kha a ni.
Nikhatah darkar 10 te lehkhabu a chhiar a. Lehkhabu pahnihte a chhiar kawp thin. Kum 9 mi chauh a nihin Encyclopedia Britannica pumpui hi a chhiar chhuak vek a ni. He thil hautak dan zia hi ngaihtuah thiam pha lo a awm theih mai thei.
Sumdawng leh ram hruaitu pawimawh ho hian lehkha chhiar hi tih ngei ngei turah an ngai a. Mark Zuckerberg-a pawh hian a lo berah kar hnihah lehkhabu pakhat tal chhiar chhuah a tum thin a. Bill Gates-a hian karkhatah lehkhabu pakhat. Mi hlawhtling leh hausa 1200 chanchin an zirchiannaah pawh, lehkha chhiar chu tih makmawha ngaitu vek an ni.
Elon Musk-a hi a tleirawl chhohah pawh, party naa a han kal ve pawhin, mi dang chu zu ina, an lama, an chet viau lai pawhin, an party na in neitute lehkhabu dahna va zawnh chhuak a, thiante sahawk laia lehkhabu lo chhiar ngar ngar chi a ni. Hei hi a unaupa Errol Musk-a sawi a ni. Anni ho party hi chu an tal nasa thin a nia, Movie velah pawh kan hmuh thin hi. Hetiang huna lehkha lo chhiar ngat ngat bik chu a danglam thlak ve reng reng. A kum rualpuite aiin a danglam chho ta zel dawng a nih hi.
A lehkhabu chhiar atang hian, rocket siam dan a hriat phah a. Tlawm zawk leh zang zawk, man man zawka siam san a ngaihtuah chhuah phah niin, Musk-a hian a sawi a. Kum 10 mi a nih atangin Science fiction lam nasa takin a chhiar a. Isaac Assimov-a kutchhuakte chu ama kaihhruai nasa zualtu a ni. “Assimov-a thuziakte atang hian mi dangte tana enna thlentu, nun awlsamna thlentu nih duhna ka neih phah a ni,” a ti! Lehkha han chhiar pawh hian, nun atana tangkai lem lo hlir chhiar hi a awm ve theih ang. Kan eizawnna leh hmalam hun atana tangkai thei tur thuziakte hi a tam thei ang ber chhiar zel phawt hi a tha awm e.
Tom Corey leh Randel Bell te hian kum 20 chuang an zir chianna atanga an hmuh chu, Lehkhabu chhiar lo leh chhiar tlem te aiin Chhiar tamte dinchhuahna chance hi a sang zawk daih a ni, tih a ni. Lehkhachhiar leh hlawhtlinna hi thui takin a inzawm a ni, an ti. Tom Corey hi Rich Habits: The Daily succesfull habits of Wealthy Individuals tih ziaktu kha a ni a. Randal Bell hian, Me We Do Be tih a ziak. Chu chu Elon Musk-a nunah pawh hian kan hmu a ni.
Miin lehkhabu ka chhiar ngai lo an tih hian mak ka ti thin a. Dinhmun pawimawh, thutlukna siam thei dinhmuna an din ngat phei chuan, ngaihte hi a thalo ru riau zel.
Elon Musk-a titi hi a ngaihnawm ang reng a. Kan han sawi chhawng ve leh a nih hi.
AWLSAM ZAWNG THIN MIZOTE
Mizote hian awlsam, buaipui vak ngailo kan zawng nasa. Thawhrim em em loha neih theih a nih chuan a dik leh diklo pawh kan thluk vak lo.
- India mi ni reng siin, Burma passport-in khawchhak lamah hnathawkin kan kal fo. Vanduaina leh thihna tawhpalhin a buaithlaj fu
- Mizo nula pakhat pawh Passport lem hmanga China a kal avangin man a ni a. India ramah thawn haw a niin, a buai phah hrep.
Point 1-na leh Point 2-na
Passport siam hi thil harsa a ni lem lo. Chuti taka buaithlak pawh a ni lo. A dan dik taka passport siam a tha ber.
- Driving license lem siam kan lo tam. Tunah hian thubuai an nei chho mek. Lirthei khalh thiam reng si chuan, a hmun dik taka driving license siam tir tur.
Henga kan buai phahna hi awlsam kan zawnna avang mai a ni. Nun kawng peng hrang hrangah hian awlsam kan zawng nasa lutuk a. Dan han zawm loh zeuhte hi pawi kan ti lo. He rilru hian thuktakin min luhchilh zel a. Kan hnam thanzelna tur atan pawh a tha lo tak zet mai.
Passport lem kan siam dan te, license lem kan siam dante en hian certificate dang pawh a lem kan siam fo ang tih a rintheih. Sim hmak tur chi, insiam thatna tur a ni.
Data corruption pawh hi a nasa viau ang tih a rintheih bawk a. Kan khawsak dan ho tak, ngaihsam tak leh ngaihtuah chian lohna hian kan hnam hi min ei chhe mek a ni.
Sawrkar lam pawhin dan dik taka tih theih tur tho si, a hma aia awlsam a ngaihtuaha tha. Mipui tana awlsam a zawnsak a tha. A engapawh chu nise, dan dinglai anga tih tur tih mai hi a tha ber a, a tlo ber!
PATHIAN PAWLNA
Bible hi nitin chhiar pawh ni ila, chhiar tam tawk tikni hi a awm thei dawn lo reng reng, Nitinin Pathian thuin min eiral hi angai…Kan Bible chhiar tam tawkloh nghawng hi a lang nitin ni mai hian ka hria a
Tawngtai pawh hi Tawngtai zawh tikni hi a awm dawn lo. Kan chhungte, kan thian te. kan rawngbawlpuite. an harsatna te, an hming lamin tawngtai sak thin ila, keimahni lam tak pawh hian kan hlawkpui a lo ni.
Kan tawngtai pawhin thingthiin tawngtai ila, Pathian hmaa mihring thingthi chu tlawmna thuk tak a nih avangin, mahni lamah pawh, ‘Muanna’ a lo thleng thei mai. Chapona hi chuan thlamuanna min lo pe thei lem lo…
The Hoppers ho hla mawi tak kha ka hre chhuak fo thin, “The Prayers of a christian an pull a man through, When he is facing this world that’s so untrue” tih kha. Hnehtu nihna hi Pathian hmaa tlawmna atangin a lo luang chhuak thin a, Bible chhiar leh tawngtai hi Pathian hnena awm rengna pawimawh tak chu a ni ngei mai.