Mizoram a professional boxing inelna lian Tata Yodha 4×4 LPS Pro Fight 2021 hmawrbawk a hnai a. Zanin atangin semi-final an khel tan dawn.
Semi-final a inhnek te hi khawvela professional boxing ziahluhna lian Boxrec-ah ziah luh an ni vek tawh dawn a. Boxer ten professional record an nei ve tawh dawn.
Boxer 200 chuang telna an inthlifim tawh a, zaninah boxer tha 10 inlanin bout nga a awm dawn.
Flyweight-ah Laldinsanga leh Joseph Lalremruata ten bul an tan ang. Laldinsanga hi amateur inelnaah Mizoram a vawi sarih champion tawh a ni a. National huangah pawh Best Boxer chawimawina dawng tawh a ni. A khingpui hi Pro Fight a vawikhat telna a ni lova, tun tumah GIG Motors Fighter of the Night a thlan nih zan a neih tawh.
Boxer langsar zingah India rama super bantamweight number one ni mek F. Zoramchhana chuan bantamweight-ah rawlthar beiseiawm David Laldanmawia a hmachhawn dawn. David-a hi Mizoram championship hrang hrangah gold medal paruk la tawh a ni.
Featherweight-ah 2019 Pro Fight final a tlawm Yuri Lalbiakdika Sanate leh state championship-ah medal a la nual tawh Lalmuanpuia te an intum ang.
Lightweight-ah Mizo professional boxer zinga hriat hlawh Vanlalawmpuia a inlan dawn. 4-1 pro record nei mek AwP-a hian vawi khat professional fight nei tawh Stephen Lalramsan Varte a tum dawn.
Welterweight ah 2019 Pro Fight a final paltlang zo lo Zomuansanga’n tun tumah final luh theihna hun a nei dawn.
Mizoram tana senior leh junior national a tum hnih tel tawh hi tun tumah knockout ve ve in a la chak.
A hma a ding tur hi Lalnunzira a ni a. Boxing inelna a a tel vawikhatna a ni chungin tun tuma boxing in vawrh chhuak tha ber pawl a ni bawk.
Semi-final inhnek turte:
Inrinni (September 24, 8:00 PM Bout – 5)
Flyweight
Bout 192 Laldinsanga (Lunglei, Ramthar) vs Joseph Lalremruata (Kulikawn)
Bantamweight
Bout 193 F Zoramchhana (Cherhlun) vs David Laldanmawia (Lunglei Ramthar)
Featherweight
Bout 194 Yuri Lalbiakdika Sanate (Vaitin) vs Lalmuanpuia (Lunglei Luangmual)
Lightweight
Bout 195 Vanlalawmpuia (Khuangthing) vs Stephen Lalramsan Varte (Churachand-
pur, Manipur)
Welterweight
Bout 196 Zomuansanga (Khatla South) vs Lalnunzira (Teirei Forest)