Vladimir Putin-a chuan a general lawk pakhat chu Russia-in Ukraine a rûn meknaa an sipaite mamawh pek kawnga hma a laknaah hlawhchhamah puhin a bân.
Gen Dmitry Bulgakov-a hi deputy defence minister ni lai niin Inrinni khan a chanvo chelh lai chhuhsak a ni tih defence ministry chuan Telegram-ah a tar lang.
Ministry chuan kum 67 mi hi chanvo dang chelh zui tura ‘chhuah’ a ni tih a puang bawk.
Gen Bulgakov-a hi Col Gen Mikhail Mizintsev-a’n a thlak dawn a, ani hi Moscow-in rawng taka lawngchawlhna khawpui, Mariupol an rûnnaa hotu kha a ni.
Gen Bulgakov-a hi kum 2008 atanga an ram sipaite mamawh hrang hrang ngaihtuah leh pekna kawnga mawhphurtu niin kum 2015-a Syria-a an sipai an tirh luh pawh khan engkim ruahmansaktu a ni.
Hetih lai hian an ram inrelbawlna hre deuhte chuan tun hnai thla eng emaw ti kal ta atang khan Moscow-ah hian a tla na lo tan hle niin an sawi a, Russia-in Kyiv an run meka hma an sawn chak theih loh chhan leh an sipaite mamawh pek kawnga vuaicha leh ti tha duh lovah puh a ni.
Tun hnaiah Kremlin hian lamtang a neih chhun pahnih, North Korea leh Iran pawh biain laipui leh drone leitir turin a dawr hial a ni.
Gen Bulgakov-a bân a nih thu puan a nih mek lai hian social media hrang hrang hrangah Russian sipai inhlawmkhawm thar leh mekten assault rifle hlui tawh tak tak an keng lai video a darh mek bawk.
Russia-a Ukraine an rûn mek thlawptute chuan Gen Bulgakov-a bân a ni leh a aiawh turaGen Mizintsev-a dah a ni chu tha an ti hle a. A aiawhtu hi Mariupol an rûnnaa a chet dan avangin UK-in an hrek mek zinga mi a ni a, a duh dan a rum theih em avangin inrûn thlawptute tan zawng tak a ni thung.
Ukrainian tam takten ‘Butcher of Mariupol’ tia an sawi, Gen Mizintsev-a hi Syria-a an ram sipaite hruaitu pawh lo ni tawhin bomb hmanga Aleppo khawpui chhu chiamtu pawh kha a ni.
UK foreign office chuan March thla khan Syria leh Ukraine-a a chet dan hmang rawng tak tak avangin kum 60 mi hi an hrek tih an puang a ni.
Putin-a’n an hotu lawkte a siksawi tih puan a nih mek lai hian amah ngei pawh indonaah hian thuk zawka inrawlhin Ukraine-a an general awm mekte hnenah pawh amah ngeiin thu a pe ve tawh thin dawn tih a ni bawk.
US thuneitute chuan Moscow-a a fawng chelhtute kara buaina awm hian Putin-a chu indonaah thuk zawkin a hnuk lut ta niin an sawi.
Thla hmasa khan UK defence thuneitute chuan Putin-a hian a defence minister, Sergei Shoigu-a chu defence thuneitu sangten an duhkhawp loh avangin a lo chawlhtir tawh niin an sawi bawk.
Hetih lai hian New York Times chanchinbu chuan Putin-a hian chhim lama Kherson khawpuiah Ukrainian sipaiten hma lam an pan mek laia an sipaite inhnuhdawh a remti lo niin an tar lang.
US intelligence chuan Russian sipaite hi an ti tawhin an mamawh thilte hmu tha thei tawh lo mah se inhnuhdawh remtihsak an ni lo niin an sawi.