Netherlands in UEFA Nations League finals khel tura an mamawh result an nei a. Belgium nen inkhelin 1-0 in an chak a, nakkuma a hmawr bawknaah an tel ve dawn.
Johan Cruyff Arena-ah Louis van Gaal-a pawlte hian league a an dinhmun a that tawh avangin goal thum aia tam a tlawm loh bak an mamawh lova. June thla a 4-1 a an hneh tawh Belgium tan hmabak a ko hle.
Van Gaal-a’n World Cup thlir tel pahin team a rem a. Team tha tak Belgium nen inkhel tawk viau mahse minute 73-naah Liverpool defender Virgil van Dijk chuan an chakna goal ni tur a khung a. Cody Gakpo corner pet a tauh lut.
Tun Nations League-ah Dutch team hi an tlawm miah lova, point ruk a sang zawkin pahnihna a awm Belgium lakah an fal.
Belgium boss Roberto Martinez chuan an intawn hnuhnun bera an result chu an siamthat a ngaih thu a sawi a. Red Devils hian a taka hlenchhuah ngei turin goal hlauhawm insiam ngun zawkah an tang.
First half-ah Eden Hazard chuan huntha a nei a, Dutch team in goal nawr aiin inven an mamawh ngun.
Second half-ah tawp dawn lamah substitute Dodi Lukebakio chuan goal ropui hmangin an si phurh a sut teuh a. A overhead kick chuan crossbar a per hlauh.
“World Cup-ah chuan kha ai khan kan ball chan kan hman that zawk ka beisei. Zaninah ball kawl leh ball inpek kualah Belgium kan tluk lo. Ball kan chan lohlai erawhin kan che tha hle in ka hria.”
“Kan khingpuite kan en tel a ngai a, kan insiksawi bakah nidang phak loh ni te a awm thei bawk. World rankings a pahnihna kan hneh nawn thei hi thil tha tak a ni.” tiin Van Gaal chuan a sawi.
World champion an tla teuh
Denmark in nakkum Finals an tlin teuh a. World champion lai France chu 2-0 a hnehin point khat chiahin Croatia an pha lo.
Telia Parken a inkhelah hian Denmark tan Kasper Dolberg leh Andreas Skov Olsen ten goal an khung a. An midfielder rinrawl Christian Eriksen chu man of the match a thlan niin inkhel kaihruaitu ber a ni a. Goal hlauhawm vawi riat lai a ball pass hmangin a team tan a siam.
France hi nikum Nations League final a 2-1 a Spain hnehtu niin tun tumah match ruk khelin point nga chiah an hmu.