Apple chuan China atanga inlak hran hret hret an tumna pakhat atan iPhone 14 chu India-ah an siam tan ve dawn tih an puang.
Company hian an phone tam zawk hi China-a an siam niin tun hnaia Washington leh Beijing inkar khi mek avangin hmun dangah kua an hreuh thar mek.
China-in ‘Covid awm miah lohna’ policy an kalpui avangin khauh taka inkharkhip kalpui thin a, hei hian sumdawnna kal a tibuai hle bawk.
Technology giant hian tun thla tir lam khan an iPhone chi thar ber hi an pho chhuak a ni.
“iPhone 14-ah hian technology thar bakah a himna tura pawimawh tak tak telh a ni a. India-a iPhone 14 kan siam tur hi kan phur hle a ni,” tiin Apple chuan an sawi.
Taiwan-a hmunpui nei, Foxconn chu Apple-ho phone tam zawk siamtu an ni a, India chhim lama Tamil Nadu-ah kum 2017 atang khan inbun tanin an handset hlui zawkte kha an siam ve thin.
Tunah erawh Apple hian an siam thar ber, iPhone 14 chu India-ah pawh siam ve an ti ta a ni.
Apple hian India-ah huang zauh hret hret zel an tum a. Nikum khan an hralh chhuah zawng zawng zinga 4% chuang mah chu India-a an hralh a ni.
US giant hian South Korean leh Chinese smartphone man tlawm zawkte an la ngam thei meuh lo va, India-a smartphone hralh that ber ber chu heng phone-te hi a la ni rih.
India-a an siam ve dawn tak avang hian an phone hi a tlawm phah dawn lem lo bawk a. Ram dang atanga hmanrua an lak luh man leh chhiah chawi a san avangin a man a danglam phah lo vang.
Hetih rual hian Indian tam tak tan chuan ‘Made in India’ tih inziak avangin a man ngai reng pawh ni se iPhone lei duhna an neih phah ngei erawh rin a ni.
India-a iPhone siam chhuah a ni tur hi Prime Minister Narendra Modi-a sorkar tan pawh hlawhtlinna a tling bawk.
Modi-a sorkar hian kum riat kal taah khan ‘Make in India’ campaign bul tanin a ram chhunga thil siam chhuah tama thawn chhuah tam theihna turin hma a la a ni.
Apple-in an phone siamna hmun an sawn chhan lian tak chu Taiwan leh sumdawnna chungchanga China leh US innghirngho reng leh hei hian thil tih zung zung a tihbuai hlauhthawnna a awm vang a ni.
Tun thla tirah khan investment bank JP Morgan-a mi thiamte chuan kumina Apple-in iPhone an siam chhuah 5% vel chu India atanga chhuak a ni dawn tiin an lo sawi tawh a ni.
Kum 2025-ah phei chuan an siam chhuah zawng zawng hmun lia thena hmun khat zet hi Asia chhim lam ram atanga chhuak a nih tawh an ring.
Nikum khan Apple supplier Foxconn hian $ tluklehdingawn 1.5 zet Vietnam-ah inbun nan an hmang niin an ram sorkar chuan a sawi.
Vietnamese sorkar chanchinbu chuan company hian an ram hmar lama huang zauhva iPhone tam zawk an siam chhuah theih nan $ maktaduai 300 zet inremna an ziak niin an tar lang bawk.