Social media-a chak tâk em vangin lehkhabu chhiar lama a khawvelpum ang pawha nasa taka a tlakhniam zut zut hnu-ah nikuma hripui leng chuan dil loh zawk malsawmna a rawn thlen te pawh a tih theih ang a, lehkhabu chhiar lamah mi tam tak an harh thar leh ta.
UK-ah nikum khan lehkhabu maktaduai 202 zet hralh chhuah niin, lockdown leh a kaihhnawih neuh neuh vangin In lamah hun tam zawk hman a ngaih phah a; phone, tv leh computer ringawta bur tawh lovin lehkhabu an leklam nasa hle. Kum 2012 hnu lama lehkhabu maktaduai 200 chuan an hralh leh theih hmasak ber a ni.
US lamah pawh thu lawmawm hriattur a awm ve mek bawk a, nikum hripui lenzualpui lai khan lehkhabu maktaduai 751 zet hralh chhuah a ni a, 2009 hnu lama an vawikhat tawnna a ni nghe nghe.
Mak angreng takin, lockdown leh a chhevel boruak rit tak karah hun rei tak hluihlawn titih tawh Radio ngaihthlak culture a vung thar leh nasa hle.
Mi tam tak lunglenna a kaihthawh theih miau avangin Radio tuipui a, lunglenna kaitho hi khawvel hmun tinah nasa takin an pung bawk.