Australia khawthlang lama Perth khawpui daia ram kang mek avangin a bula cheng mi thahnem tak insuan chhuah ngaiin an awm phah mek a, he khawpui hi coronavirus avangin an inkharkhip mek bawk.
Thuneitute chuan khawpui hmar lama ram kang avang hian chenna in 30 vel a chhia niin an sawi a, ram hectare 7,000 chuanga zau a kai tawh bawk niin an sawi.
Thli chak tak leh khaw lum lutukin ram kang hi a pui nasa hle a, Perth-ah hian khaw lum lam hi 35C a kai phak.
Western Australia premier chuan emergency pahnih an hmachhawn mek niin a sawi.
“Tunah hian WA chuan emergency pahnih, ram kang leh Covid-19 inkharkhip kan hmachhawn mek,” tiin Mark McGowan chuan a sawi a. An khawpui dinhmun chu a khirh hle tih a sawi bawk.
An state khawpuia cheng mi maktaduai hnih vel chu Zirtawpni atang khan inkharkhip hnuaiah an awm tan leh mek.
State sorkar hian Pathianni atang khan vantlang hriselna lamah hlauhthawnna an nei thar a. Inkhung hran nana hman khualbuk pakhat vengtu chuan hri a kai tih an hre chhuak a, hei hi thla 10 hnua tual chhunga hri kai leh hmasa ber a ni a, amah hi lirthei khalha ei zawng a nih tel bawk avangin an hlauthawng.
Nimin tuk khan Perth-a chengte chu khawpui daia tlang ram kang khuin a bawh nasa hle a, a hma zan zankhua khan a kan belh nasa hman hle.
McGowan chuan khawpuia chengte chu ram kang laka hlauhawm pha an ni lo tih hrilhin hri an inkai darh zel loh nan ina tawm zui zel turin a ngen.
Hri kai an hmuh chhuah tharin a hnimhnaih deuh mi 150 an chhui chhuahte zingah tumah hri kai an lo awm lo niin a sawi bawk.
Hetih lai hian ram a kanna hmun atanga km 50 vela hla, khawpui daia chengte chu mei vapin a bawh nasa hle.
Perth hmarthlanga Swan khaw mayor chuan an khaw daia phaizawl chu Thawhtanni zan khan zau tak a lo kang tih a sawi.