United States nuai tawh zinga a na ber pawl, Hurricane Ian avanga chhiatna hrang hrang thlenga thi chu mi 40 chuang an ni tawh a. White House chuan President Joe Biden-a pawhin a tuartu, Florida chu a tlawh dawn tih a puang.
Florida-a chengte hian Inrinni khan chhiatna thlen dan kimchang zawk an hriat belh a, chhanchhuah hna thawktute chuan chhim lam vaukam hmun hrang hranga dam chhuakte zawn hna an thawk ngawrh hle.
Biden-a leh a nupui, Jill chuan Nilaini hian Florida hi an tlawh dawn tih White House Press Secretary Karine Jean-Pierre chuan Twitter-ah a tar lang a. Thawhtanniah thla hmasaa Hurricane Fiona-in Puerto Rico-a chhiatna a thlente enpuiin an kal hmasa phawt dawn a ni.
Category 4 hurricane-in Nilainia a nuai hnuah khan Florida-ah hian chenna in, thingpui dawr leh sumdawnna hmunte a chhe nasa hle.
Florida Medical Examiners Commission chuan Inrinni zan thleng khan mi 44 an thi tawh tih an sawi a, county hrang hrangah thi an hriat belh thu leh la pung thei a nih thu an sawi.
Na taka tuartu, Lee County-ah bik pawh mi 35 thi an awm niin sheriff-in a sawi a. Hetih lai hian US chanchinbu thenkhat chuan hurricane avang leh a kaihhnawiha chhiatna thlenga thi hi mi 70 chuang an ni tih an tar lang hlawm.
Vaukama awm bawk, North Carolina state-ah pawh governor pisa chuan mi pali an thi niin a puang.
Florida-a Lee County-ah hian Inrinni khan Matlacha thliarkara lawnglenga tangte chhanchhuah an ni a. Khawlaiah hnawk, lirthei chhia leh thing tlu leh hnawl a tam hle.
Matlacha hi mihring 800 chuang hret chenna niin a kalpawhna lei pahnih a chhiat avangin tlawhpawh theih an ni rih lo.
US-a inhumhimna zawng mi 16-te chu hurricane a thawh laia an lawngleng bo taah an thi nual niin US Coast Guard chuan an sawi a. Mi pahnih chu an ruang hmuh niin pakua chhanchhuah an ni a, an zinga pali hi Cuban niin Florida Keys-ah an inhleuh kai a ni.
Florida-ah hian Inrinni zan thleng khan mi 9,00,000 chuangin power an la nei lo va, hei vang hian mi tam tak chu an tawmna atanga la haw thei lovin an ina chhiatna thlen dan an la hre thei lo hlawm.
Thil chhia vel chhuttu, CoreLogic chuan thlipui thawkin Florida-a chhiatna thlenga thil chiat hlut zawng hi $ tluklehdingawn 32 zet a nih dawn thu leh tui lian bikah $ tluklehdingawn 15 a nih tur thu a sawi.
“Kum 1992-a Hurricane Andrew hnua Florida-in a tawrh nat ber a la ni,” tiin CoreLogic-a an hotu, Tom Larsen chuan a sawi.
Inrinni zingah khan Governor Ron DeSantis-a pisa chuan chhanchhuah hna thawktu mi 1,100 chuang tirh chhuah an ni thu a sawi.
Heng mite hi vau kam hrula in tina lutin puih ngaite an dap niin DeSantis chuan a sawi bawk.
Floridian tam tak chu Ian thawh hma khan hmun himah suan an ni a, sang tel chu tawmna tur siamah awmin tam tak a kawng zawh lo tur laiah an inkhalh chhuak bawk.
Fort Myers bula Pine Island leh Sanibel Island chu a tuar na ber niin khawmual pangngai atangin kalpawh theih an la ni lo.
Vansang atanga thlalakah chuan Sanibel hmun tinah chhiatna a thleng tih a lang.