Assam Police-ten October 1, 2022 khan commando training-na hmun tur nia sawiin Bairabi Zophaiah buk pahnih an sa a, Bairabi mipuiten thiat tura an nawr hnuah nimin khan Assam lamhian an thiat a, boruak duhawm lo a thleng zui lo.
Bairabi khawtlang hruaitute hnen atanga thudawn danin Assam sorkar mi nia ngaihte hian kar kalta Inrinniah bultanin Zophaiah hian dap hmangin buk an sa, Pathiannia buk pahnih an sak zawh hnuah Bairabi khaw mi thenkhatten hmuin Pathianni zan khan Bairabi khawtlang hruaituten thiah tumin hma an la nghal a; anmahni lo dangtu police-te nen pawh nimin zing dar 4 vel thleng khan an innawr buai a ni.
Nimin khan Bairabi khaw mipuite chu Assam sorkarin buk an sakna hmunah pungkhawm lehin buk chu thiat turin Assam sorkar an phut a, mipui kutthlak ngai lovin Assam lamin chawhnu khan a pahnihin an thiat a, boruak duhawm lo dang thleng lovin mipuite pawh an tin darh zui ve nghal nia thudawn a ni.
Assam lamin kut an thlakna hmun hi Ch. Chhunga leilet, Mizoram leh Assam lamin kutthlak lohna tura tih, status quo huam chhung niin, kum 2017-a MZP-in Zofate Chawlhbuk sak an tumna atanga hla lo têa awm niin thudawnna chuan a sawi a. Status quo huam chhunga Assam sorkarin kut a thlak leh avang hian MZP hruaitute pawhin Bairabi hi pan nghalin Assam sorkar chu an buk sak thiat turin an phut ve nghal bawk.
He thil thlenna hmuna awm, Katlicherra Police Station OC Inspector Santanu Das-a’n Mizoram thuthar thehdarhtute zawhna chhangin buk an sak chu training turte chenna tur a nih thu a sawi a, Gauhati-a hotute thupek anga sak a nih thu a sawi laiin, buk sakna hmun tlawhtu, Kolasib SP Vanlalfaka hnenah chuan Katlichera OC chuan an buk sak chu commando-te training-na hmun tur nia a hriat thu a hrilh ve thung.
Status quo huam chhunga Assam sorkarin kut a thlak leh avanga nimina Bairabi North VC House-a thutkhawmah bialtu MLA, Minister of State K Lalrinliana’n ramri buaina avanga Mizo thalaiten Assam Police kut an tawrh an rem ti ve lo tih sawiin, “An hmaah kan ding zel dawn,” a ti a. Zophai status quo huam chhunga Assam hmalakna chungchangah pawh state pahnih chief minister leh home minister-te an inbe nghal niin a sawi.
He thutkhawmah hian Kolasib SP Vanlalfaka Ralte pawhin chanchin an hriat ve leh Hailakandi SP a biak nghal thu sawiin, ramri buai laiah hmalakna a awm loh thu leh buaina tur a awm loh thuin a lo chhang niin a sawi a. Status qou huam chhung a nih thu a hrilh hnuah Hailakandi SP chuan thuneitu sang lamah a lo thlen tur thuin a chhang leh nghal niin a sawi.
Kolasib DFO Margareth Lalramchhani pawhin Hailakandhi DFO a biak nghal thu sawiin, anni chuan an hmalakna a nih loh thuin a lo chhang niin a sawi a. Forest Minister TJ Lalnuntluanga’n a hmuna kala thil awm dan hre chiang tura a hrilh thu leh ramri hmalaknaah forest department an tlanchhiat dawn loh thu a sawi.
Zampuimanga Group YMA President C Lalbiakenga’n ramri-ah boruak dang a awm changin Mizoram sorkar leh department te an che muang thin nia sawiin, hei hi veiawm an tih thu a sawi a. Tun tuma Assam hmalakna chungchangah pawh sorkar a chet muan avangin Mizo leh Mizo inkarah harsatna dang a awm hman tep niin a sawi a. Assam sorkar miten buk an sak tur chu a bultan tirhah pawh Mizoram sorkar official thenkhatin an hriat thu sawiin, official-te chu ‘muang tawh suh u’ a ti.
Assam sorkarin Mizoram chhunga buk an sakna boruak sosang ngaihvena Bairabi tlawhtu, Minister of State K Lalrinliana hian khawtlang hruaitute a thutkhawmpui hnuah Kolasib a pan leh nghal a, Zophai hi a tlawh lo niin a hmuna kal thuthar thehdarhtute chuan an sawi.