Manchester a roreltu nih inchuhin a sen leh a pawl an insu a. Premier League champion lai leh manager thar hnuaia tunhnaia phur thar te inkhelah an inkar inthlauhna erawh a la zau hle tih a lang. Manchester City in 6-3 in Manchester United an hneh.
Etihad Stadium-ah Pathianni zanah United an lenglut a, tun season a Manchester derby hmasa berah Man City tlarhma a khel pahnih Erling Haaland leh Phil Foden ten an ching phar hneh.
An inthlau a ni
Erik ten Hag-a pawlten tunhnaiah hmasawnna sawi tur nei mahse Pep Guardiola team ten an boruak an vaw chhe chiang hle. An khingpuite stadium-ah a tir atang a tawp thlengin a ti zawkah an tang mai a ni lova, kawng engkimah an inthiam hleih.
City in goal khung turin minute 8 chauh an mamawh – chance hlauhawm an insiam fo hnuah Bernardo Silva ball cross chu Foden-a’n goal-ah a thai lut.
Minute 34-naah Haaland-a hun a thleng. Premier League ah a mikhual miah lo tih lang lehin corner atangin an goal hnihna a tauh lut. Minute thum hnu lekah Kevin de Bruyne ball duhthusam chu goal-ah khung lehin halftime hma in Foden-a goal khung tur a siamsak leh bawk.
Second half-ah United tan forward thar Antony chuan yard 25 a hla atangin goal mawi a khung. Halftime hma a haw ve lo away fans te tan au na tur a siamsak.
Mahse City an chhaihkawlh chauh a ni thung. Haaland-a’n a hattrick siam nan Sergio Gomez-a cross chu goal-ah chiang takin a khung a. Foden-a hattrick siamna tur ball tha a pe ve leh bawk.
United in substitute Anthony Martial hmangin second half tawp lamah goal hnih an khung belh ve a, mahse pawi thei tur a pawi vek tawh. Mualpho takin khelmual an chhuahsan.
Viking thisen kai Haaland tunge dang thei?
Manchester City in nipuiah an lalut a, khawvela striker ngaihven hlawh ber hian hun a mamawh rei lo.
Inkhel vawi 11 bul a tan tawh atangin goal 17 a khung tawh. Manchester City in tun season a goal an khung zawng zawng atang goal 20-ah a inrawlh.
Premier League-ah hattrick vawi thum siam nan match 8 chauh a mamawh a. League goal 14 khung tawhin Micky Quinn, Papiss Cisse leh Diego Costa ten record an siam Premier League game an khelh hmasak 10 atanga goal 11 an khung chu a pel var var a, anni aiin khelh hnihin a khel tlem zawk.
Eng nge an sawi?
Manchester City manager Pep Guardiola chuan, “Kan huaisenna leh kan rilru puthmang kha inkhelah a lang a, a tha hle. Mahse an player-te enin kan fimkhur ve a ngai.”
“Result chu engpawh nise kha aia tha zawka tih theih kha kan la nei. Duhthusam hi a awm thei tak tak ngai lo. Kan kheltha a, mahse hmasawn theihna lai kan nei.” a ti a.
Goal khungtute fakin, “Haaland-a statistics hi sawi belh a ngai lo. Helaia a lo kal hma atang tawhin hetiang hi a ni tawh. Phil Foden hi player naupang a ni chungin eng team-ah pawh khelh reng a phu, a inpekna leh thiamna hi a hlu.” a ti.