Aizawl : Champhai bula Keilungliah lui khuah mek enkawl zui kawnga hmalatu tura sorkarin a din, dist level committee chu nimin khan an chairman, Champhai Bawrhsap James Lalrinchhana hovin an thukhawm a. Hmalakna tur chin hrefiah tura tuikhuah huam chin ram leh a dinhmunte enfel an rawt a. A tul angte tifel turin Revenue, PHE leh Forest department-te hma la turin an ti bawk.
Bawrhsap chuan Keil- ungliah tuikhuah chu Champhai tana rohlu leh ngaihhlutawm tak tur nia sawiin, Champhai dist leilung mawina bakah khualhip thei tura tangkai tak tur a nih thu a sawi a. Khawtlang nen tangruala enkawl ho a pawimawh thu a sawi.
Executive vice-chairman SE, PHED Champhai WATSAN Circle C. Lalhmachhuana’n tuikhuah hna chu za-a 98 zawhfel a nih tawh thu sawiin, Service road, leimin venna kawng kam chei leh control room siam hna kalpui mek a nih thu a sawi bawk a ni.