Ukrainian sipaite chuan dan lova Russia-in ram an neihsak mekah hma an sawn thar leh a, Kyiv sipaite hi chhim lama Kherson hnaih tak thleng tawhin khawchhak lamah pawh ram an lak belh bawk.
Russia-in thuneitu tura Kherson-a a dahte chuan Ukraine-in ram an lak belh thu hi an sawi chiang tawh a; mahse, Moscow sipaite an la awm rih tih an sawi tel.
Khawchhak lamah pawh Ukrainian sipaite hian Russian-te luah lai, Luhansk region an lut belh bawk.
Ukraine President Volodymyr Zelensky chuan ‘region hrang hrangah ram thar an neih belh’ tih a sawi.
Thawhtanni zana thu a sawiah President Zelensky chuan ‘hmun tam takah inbeihna a la awm chhunzawm’ tih a sawi a, a kimchang erawh a sawi lo va. Ukraine-in Russia an nawr let thut hi inveng tha taka kalpui a nih thu leh thuthar lakhawmtute pawh a hmatawng atanga hla taka awmtir zel an nih thu a sawi.
Chhim lamah Kherson-a Russia-in hruaitu tura a dah, Vladimir Saldo chuan Ukrainian sipaite hian Dnipro lui kama Dudchany khua an luh tawh thu a sawi a, hei hi a hmaa an awmna aiin km 30 vela hla a ni tawh.
“Hmun awmte chu Ukrainian sipaiten an luah,” a ti a. Russian thenkhat chuan Dudchany hi Ukrainian-te kuta awm tawh angin an sawi bawk.
Russian defence ministry thupuangtu, Igor Konashenkov pawhin chhim lamah hian anmahni aia Ukrainian tank tam zawk chuan Zolota Balka khua, a hmaa an inbunna kal pelin Dnipro kam an thleng niin a sawi ve bawk a. He indonaah hian Russian-ten Ukrainian sipai 130 chuang an that niin a sawi bawk.
Saldo chuan Ukrainian sipai battalion hnihin Kakhovka hydroelectric power station thlen an tum mek niin a sawi a, hei hi Kherson khawchhak lam km 70 vela hla a ni a. Power station hi lawngchawlhna khawpui, Nova Kakhovka-a awm a ni.
Ukrainian-ten hma lam an pan zel hi Dnipro kam thlang lama Russian sipai 25,000 rual awm mekte chak lakna tihtawp an tum vang niin Reuters news agency chuan a tar lang.
Kyiv sipaite hian khawchhak lamah pawh hma sawn zelin Moscow-in kar hmasa tawpa an rama an neihsak, Luhansk region an pan mek zel a, he region hi a hma chuan a pum deuhthawa Russian-te thunun a ni.
Inrinni khan Ukrainian sipaite hian khawchhak lama khaw pawimawh tak, Lyman an la a, hei hi Luhansk region ramri bul mai a ni a. Russia sipaite hian Lyman hi inchhekna pui ber atana an lo hman tawh kha a ni.
Luhansk-a Russia sipai commander pakhat chu Ukrainian sipaiten kilometre tam vak lo an um hnuah an that nia sawi a ni nghe nghe.
Ukrainian-te hian Russian-te awp tho, Kreminna leh Svatove an pan zui leh a, Kremlin lam tantu blogger thenkhat chuan Russian sipaite hi insaseng tura thupek niin an tar lang hlawm.
Kherson leh Luhansk te hi Russian President Vladimir Putin-a’n heng laia chengte ngaihdan (referendum) laa an duh zawk nia chhala an ram anga a pawm thar region pali zinga mi a ni a. Mipui ngaihdan lak dan hi Kyiv leh khawthlang ramte chuan an dem hle a, heng region pali hi a hma pawhin Russia-in a pum puia thunun an nei hlawm lo.