Telangana Chief Minister K Chandrashekar Rao chuan kum 2024-a ram pum inthlanpui lo awm tur thlirin a kaihhruai party chu hming thar, Bharat Rashtra Samithi (BRS) tih puttirin ram pum huapa chet chhuah a tum.
Nilaini chawhnu dar 1.19 atang khan Telangana Rashtra Samithi (TRS) chu BRS tih a nih tak thu Rao chuan an party an thutkhawm zawhah a puang a. Worker-te chuan a lawm nan halpuah halin Hyderabad khawpuiah rawng senno an phuh chhuak chuai chuai bawk.
Party hming thlak hi Election Commission pawhin a pawmpui tawh niin anni hi national party-te hriatpuitu a ni.
Party thar hi national party nihna chang tur chuan state pali emaw talah state party a nih emaw a ngai a, state pali emaw talah hian vote tla 6% tal an hmuh a ngai a, Lok Sabha-ah member pali tal an neih a ngai bawk a. Hetiang a nih loh pawhin state pathumah tal Lok Sabha member zawng zawng zinga 2% (seat 11) tal an chan a ngai.
TRS hi tun dinhmunah chuan Telangana-ah chauh an la lian rih.
Rao chuan kum 2024 inthlan turah hian BJP dova Prime Minister Narendra Modi chu paih thlak a tum tih chiang takin a lo sawi tawh a. Nikum khan BJP hi na tak takin a lo bei tawh a, Modi-a’n an state a tlawh tum pawhin tumhmuna lo dawnsawn loh te, a hun hmannaa telpui loh te pawh a nei.
Party thar anga awma hming thlak tur hian KCR tia hriat lar, Rao-a hian state danga a sangawizawnpui – Mamata Banerjee (Bengal), Nitish Kumar (Bihar), Arvind Kejriwal (Delhi), MK Stalin (Tamil Nadu), Pinarayi Vijayan (Kerala) leh Naveen Patnaik (Odisha) te a lo kawm kual tawh.
Nilainia party din tharnaah pawh hian Karnataka chief minister hlui, HD Kumaraswamy leh DMK thawhpui, Thol Thirumavalavan mi leh sate an tel.
Tun tumah hian kum 2018 ang lo takin KCR hian regional party-te chu thawhpui a tum lem lo va. “Kalphung ngaiin, mipuite tana hmasawnna leh politics chu thupui ber a ni ang,” tiin a lo sawi tawh.
KCR hian mi hrang hrangte mamawh phuhruk a nih theih nan lo neitu pawl, sumdawng tangho leh vantlang pawl hrang hrangte biain thawhpui dan a lo dap tawh thin a ni.
“KCR hian party-te hi huang khata awmtir a tum a. Prime minister nih a tum lo va, hmasawnna rualkhai thlen a tum a ni,” tiin TRS MP KR Suresh Reddy chuan NDTV a hrilh a. Party thar kalpuiin eptute vote tidarhin BJP a pui mai mai zawk thei ang em tih chu a nih loh tur thu a sawi bawk.
“BRS-in BJP a pui dawn anga ngaihna chu tih mai mai a ni. KCR hian ram pumah mi a sawm dawn a ni,” a ti.
A party mite chuan KCR hian Telangana-a thil a kalpui dan chu ram puma pho chhuah a duh niin an sawi.
KCR hian December 9 hian Delhi-ah vantlang inkhawm koh a tum a, hei ni hi kum 2009-a khatih laia Congress sorkarin Telangana state hran a din a puan ni kha a ni.
Party hming thar hian inthlan a hmachhawn nghal thuai dawn a, Telangana-a Munugode-ah bye-election a awm dawn a, November 4-ah a ni ang a. EC-ah TRS tih a la nih rih avangin hming thar a la pu dawn lo thung.