- Ruata
September thla chhunga passenger vehicle siamtu company hrang hrangte lirthei hralh dan dinhmun kan lo tarlang tawh a. Tun tumah hian India rama lirtheia huanga hralh kal leh lar ber pawl ni mek SUV huanga lirthei hralh kal ho September thlaa hralh dan dinhmun kan en leh dawn a ni.
- Maruti Suzuki Brezza
Maruti Suzuki chuan an compact SUV lar em em, Brezza chu 15,445 an hralhchhuak a. Hei hi nikum September thlaa hralh zat 1,874 nena khaikhin chuan hmasawnna tha tak a ni. July thlaa tlangzarh Brezza new model chuan book tu nuai 1 chuang a nei tawh a. Tunah hian Brezza hian 1.5 litre K15C naturally aspirated petrol khawl, 5 speed manual leh 6 speed torque converter automatic gearbox nei a hmang a ni.
- Tata Nexon
Tata company compact SUV tha leh hralh kal tak mai, Nexon hi September thla khan 14,518 hralhchhuah a ni a. Tata Nexon hi thla 6 kalta chhung khan thlatin 14,000 atanga 15,000 hralh ziah ang a ni a, India ramah chuan tunhnaiah chuan SUV hralh kal pawl tak a ni. Nikum September thla khan 9,211 hralhchhuah a ni a, Nexon pawh hi market lamah chuan hma a sawn viau a ni. Tunah hian petrol, diesel leh electric hmang duhthlan tur a awm a, Nexon EV hi India rama electric lirthei hralh kal ber a ni mek a ni.
- Hyundai Creta
Midsize SUV huanga lirthei hralh kal tak Creta hi September thla khan 12,866 hralh a ni a, nikum September thla kha chuan 8,193 hralhchhuah a ni thung a ni. Khawl chi thum 1.5 litre naturally aspirated petrol, 1.5 litre turbo diesel leh 1.4 litre turbo petrol te a awm a ni.
- Tata Punch
Tata Punch hi subcompact crossover SUV niin SUV huanga chhiarah chuan lirthei te ber huanga mi a ni a. Tlangzarh anih atangin 10,000 chuang hralhchhuah ziah ang a ni a, thla hmasa khan 12,251 hralhchhuah a ni a. September thlaah khan India rama passenger vehicle hralh tam ber 8-na niin lirthei hralh kal em em Maruti Suzuki Swift leh Hyundai Venue te a rawn khum thei a ni. Punch hian 1.2 litre 3 cylinder naturally aspirated petrol khawl a hmang a ni.
- Hyundai Venue
Hyundai hian an SUV lar leh hralh kal Venue hi thla hmasa khan 11,033 an hralh thung a. Nikum September thla khan 7,924 an hralh a ni. Venue hi a thar a chhuahna a la rei lo a, a aia thar lehzual Venue N Line a awm leh ta bawk a. He SUV hi chu hralh a kal zual telh telh dawn niin a lang a ni.