Art & Culture Department leh Central YMA tangkawpin Aizawl khawpui huam chhunga YMA branch zaipawlte inelna atana ramngaih hla-a inelna a buatsaihah Dawrpui YMA Zaipawl pakhatna an ni a. Conductor tha berah H. Lalmalsawma, Durtlang Branch YMA Zaipawl conductor chu thlan a ni thung.
Aizawl khawpui huam chhunga YMA branch zaipawlte ramngaih hla-a inelna hi nimin khan Vanapa Hall-ah zawh fel niin, he inelnaa tel zaipawl 34 atanga a tha thlan zaipawl paruk an inel a, nimin vek khan result puangin lawmman sem nghal a ni.
YMA zaipawl inelna kharna inkhawm hi Art & Culture Minister R Lalzirliana pawhin telpuiin Zonun mawi a ral mai loh na tura ramngaih hla zaipawla inelna chu buatsaih a nih thu a sawi.
Art & culture minister chuan zaipawlte thiam lam leh a mawina ringawt ni lovin Zonun mawi – tlawmngaihna, huaisenna, aia upa zahna, rinawmna te; pi pute nun hlui leh Zoram mawi tak chawi lar tura hla phuahtuten hla an lo phuahte chu thangtharten an hriat chhawn chhoh zel theih nan leh a thiam an tam theihna tura he inelna hi buatsaih a nih thu a sawi bawk.
He inelna hi Thawhtannia tan niin inelna hla atan – Ro min relsak ang che, Raltiang i kai ve ang, Khuavel i la chhing ngei ang, Pi pu chhuahtlang hlui leh Sangha vuak hla te hman a ni a. Aizawl khawpui huam chhunga YMA branch 34 atangin zaipawl member 1,337 an tel a. Zaipawl 34 atangin a tha zual zaipawl paruk thlan chhuah zingah Dawrpui pakhatna an ni a, 2-na Durtlang; 3-na Ramthar North; 4-na Bawngkawn; 5-na Ramhlun South; 6-na Bethlehem Vengthlang te an ni.
YMA Zaipawl thiam bera thlan, Dawrpui YMA zaipawlin lawmman Rs. 1,00,000 an dawng a, pahnihnain Rs. 70,000; pathumnain Rs. 50,000, palina leh panganain Rs 20,000 dawngin, he inelnaa tel zawng zawngten Rs. 10,000 theuh an dawng.