College of Veterinary Sciences & Animal Husbandary (CVSc & AH), Central Agricultural University, Selesih-in Children Blessing School, Nausel, Sihphir te nen nimin khan Artui Ni – World Egg Day an hmang a. CVSc & AH, Central Agricultural University, Selesih-a Dean Dr. Lalnuntluangi Hmar-in a hmanpui.
Kumina Artui Ni thupui hi – Hriselna leh chakna tha zawk neih theih nan Artui ngei hi le (Eggs for a better life) tih niin, Assistant Professor Dr. Lallawmzuali Ralte-in Artui thatzia leh hrisel ziate, naupang leh tar chaklote, damsamlo leh taksa chaklote tana chaw tha a nih thu te a sawi a. CVSc & AH, Central Agricultural University hian Children Blessing School, Nausel te hnenah hian White board 3, Plastic chair 6 leh chalk leh duster te an pe a ni.
World Egg Day hi kumtin October thla karhnihna Zirtawpni apiangin hman thin a ni a. Kum 1996-ah International Egg Commission (IEC)-in Vienna-a inkhawmpuilian an hman tumin World Egg Day hi hman thin ni se, tiin a rel a, khawvel pumah hman zui a ni a. He ni hman chhan bulber chu mipuiin Artui chu mihring tan chaw tha leh hrisel tak a ni tih an hriat zau zel theih nan te he ni hi hman thin a ni.