Myanmar-a tan in sawi hlawh tak ni thin, Yangon-a Insein prison-a thil puakah mi pariat vel an thi.
Tual chhung mite chuan Nilaini tuk khan a luhna pui ber bulah parcel bomb pahnih a puak niin an sawi a, thawktu mi pathum leh tlawhtu mi panga an thi.
Insein prison hi an rama tan in lian ber niin mi 10,000 chuang dah an ni a, a tam ber hi politics thil avanga mante an ni.
Bomb puak hi eng pawl mahin an tihah an la chhal lo va. Thuneitute chuan mi 18-in hliam an tuar bawk niin an sawi.
Thuneitute hian bomb hi tan ina post room-a puak niin an sawi a. Bomb dang, la tihpuah loh chu a hnuah plastic bag-a funin an chhar bawk.
Tlawhtu thite hi hmeichhia vek an ni a, mi tang mek chhungte an ni hlawm tih thuneitute hian an sawi.
An zinga pakhat chu nikum June thlaa Myanmar-a sipai sorkarin zirlai hruaitu an man, Ko James-a nu a ni a. A fapa hi tun karah court-ah a chungthu ngaihtuah tur niin chaw pek tuma a kal a ni.
Insein prison hi an khawpui hlui zawk daia awm niin a zau hle a, nasa taka ven a ni bawk.
Kum 100 chuanga upa tawh tan in hi a mi tangte enkawl leh an tih dan vel avanga sawi hlawh tak ni thin a nih thu mihring dikna chanvo humhalhtute chuan an sawi.
Myanmar hi tunah hian sipai sorkar hnuaia a awm mek a, nikum khan Aung San Suu Kyi-i kaihhruai mipui thlan sorkar an paih thla a, hemi hnuah sipai duh lohna nasa taka lantir niin sipaiten an chhang let bawk a, tharum thawhna a thleng nasa hle.