Thlakhat liam ta vel atang khan i thiannu bulah hengte hi i sawipui tawh em?
Kan pa hi football bak engmah tui a nei tawh lova, a thu nghet tlat zel
Remote ka kawl thei tawh lova, a keipui sa hauh bur thin
Dar 9:30/12:30 a rik dek dek tawh chuan a biak hleih theih tawh loh reng reng
Buaithlak ta ber maia chu – A bula in lak ‘sexy’ pawhin awmzia a nei lova, TV bak a en peih lo!
A tha e. Kartawp inkhel boruak vanga pasal te be hlei thei lo i nih a, i pasal lahin, inkhel bak a tui pui lova, engmah a sawi pui thei bawk si lo anih chuan inkhelh hun chhung boruak ninawm leh rei ang reng tak hman tangkai dan tur hi i hmâah chhawp chhuah a ni ta e.
Mamawh dilna hun lawmawm
Inkhel en tui tak tak tawhte hian thil dang hi an ngaithla liam puat thin a, an ngaihtuah ut ut peih ngai lo. Hemi hun chunga i thusawi zat ve pawh hi a hrechiang lo mai thei. Khai le, i mamawh leh duh tak, thawmhnaw emaw ei tur emaw lei nan pawisa han dil chhin teh! “Mama nu, a tha a lawm, ka bag-ah khan pawisa a awm kha,” a tih loh ring ngam suh. Khang i thil dil vel ai kha chuan goal leh yellow card hmuh hman loh te kha a hlau fe zawk. Hrethiam mai em? I duhzawng sawiin dil chhuak la, pekin i awm mai ang.
Mimal hunawl leh remchang
Nupa nih mai vanga pasalte nena insi lek leka awmdun reng emaw, pumkhat nih tawh mai vanga inkuah ngur ngur reng tur tihna a ni lo. Pasal te hian thlahlel ṭhin pawh nise, Euro boruak ṭang takah hi chuan an rilru-ah a phe zeuh pawh a lang lo. Chuvang chuan, he hun hi nangma mimal thil pawimawh leh tuizawng ang chi tih leh, buaipuinan hun rangkachak a ni tih hria-in, rilru engthawl leh hahdam takin kalpui rawh le.
Zawm mai rawh
Inkhel en hi i tui emaw, tui lo emaw i pasal hi kawng hrang hranga tlansan hleih theih loh a ni a, amah pawhin sawi chhuak kher lo mahse, eng emaw chang hi chuan a duh ber team han tan pui emaw, a team ṭan ber jersey hak a, a bula ‘hot’ taka lo au pui vel te hi a lungthu tikimtu pawimawh tak a ni a. Pasal bula ṭhut a, bengchheng lo siam ve te pawh hi a ṭulna chen a awm a, a thinrim lo khawp ang.
Khai le, Footbal hi thu fahrahte te hmanga tihtauhkhum nan emaw phunchhiarna leh tlak duahna hun atana hmang mai lovin, i tan pawha hlawkna leh a tan pawha hloh lohna a nih theihna turin fing thiam takin hman tangkai tum rawh le. Good Luck!