Tanzania-a kangthelhtute chuan Africa khawmualpuia tlang sang ber, Mount Kilimanjaro-a ram kang mek theleh tumin theihtawp an chhuah mek niin tual chhung thuneituten an sawi.
Ram kang hi Zirtawpni zan atanga intan kha niin he tlanga lawn thinte kalkhawng lun ber hrulah a ni.
Tlang pang awihah hian mei alh hluah hluah leh a khu invawrh hlawm tup tup pawh hmuh tur a awm niin a hmutute chuan an sawi.
A kan chhan hi hriat mai theih a la ni lo va, engtia zau nge a kan tawh tih pawh hriat a la harsa rih a. Mihring thi leh hliam pawh an awm hriat a la ni lo.
Kum hnih liam taah khan Mount Kilimanjaro pang awihah hian chawlhkar khat chhung zet ramngaw kanginram hectare sang chuang a kang chhe tawh a ni.
Inrinnia social media-a video thehdarhahte chuan meialh nasa tak leh a khu chhah tak chuan tlang chhehvela ramngaw zau tak a tuam tih hmuh theih a ni.
Tlang awmna lai region-a police lal chuan eng ang chiaha ram kang hi nasa nge tih an la hriat loh thu a sawi niin AFP news agency chuan a tar lang.
Kilimanjaro regional head Nurdin Babu erawh chuan thlawhna an tirh chhuah chu chhum chhah leh meikhu nasa lutuk avangin a tum thei lo niin tual chhung chanchinbumite hnenah a sawi.
Tanzania National Parks Authority (Tanapa) chuan ram kang thelh tur hian mi 300 tirh chhuah an nih thu a sawi a. Emergency worker an tih, kangthelhtu leh police, wildlife park ranger leh tourism company-a thawkte pawhin kang thelh hna hi an thawk bawk tih a sawi.
Mount Kilimanjaro hi metre 5,895-a sang niin khualzin a hip hle a, kum tin mi sang tel an lawn thin a ni.