Pacific tuipui kam, Mexico-a khaw eng emaw zat chu Hurricane Roslyn-in a pan mek a, khawmual a kai a nih chuan thlipui, ruah tam tawk leh tui lian nasa tak a thlen ngei rin a ni.
Category 4 storm Roslyn hian darkar khata km 209-a chak thlipui kengin Pathianni tuk (India huna zan thim hlim) khan khawthlang lama Nayarit state-ah khawmual a kai hman rin a nih thu US National Hurricane Center (NHC) chuan a sawi.
Tual chhunga rikrum thila che chhuak thinte chuan Roslyn lo thleng tur hmachhawn tur leh an tawrh nat lutuk loh nan nasa taka inbuatsaihin hma an la.
Nayarit state hi khawvel huap pawha tuipui kam lar leh tlawh tam, miin chawlh nana an hman awm tamna hmun tak a ni.
“Roslyn hian khawmual a kaina bakah a chhak lam tuipui kamah te tui lian a thlen ngei rin a ni,” tiin India huna Pathianni zing dar 8:30-a NHC-in bulletin a tihchhuahah a tar lang.
“Tuipui kam hnaihah hian tui lian bakah tui fawn sang leh chak tak, thil tam tak tichhe thei pawh a thleng dawn a ni,” tiin an sawi lawk a, tlangram hmun khawkrawk laiah chuan ruah sur nasa avanga lei pawh a min theih dawn thu an sawi bawk.
Nayarit, Jalisco leh state dang eng emaw zata thuneitute chuan mipuite tawmhimna tur hmun an buatsaih hlawm.
Mexico-ah hian hurricane thawh hun (season) hi June leh November inkar niin Pacific leh Atlantic vaukama miten an tuar nasa thei hle a ni.
May thla khan chhim thlang lam, Oaxaca state chu Hurricane Agatha-in nuaiin mi 11 an lo thi tawh.
US weather service-a scientist-te chuan kumina hurricane season-ah hian hurricane insiam a tam hle tih an sawi a, ni danga insiam leh thawk thin zat aia tam daih insiamin storm, hurricane leh major hurricane hming vuah tura an inruahman aia tam a thawk niin an sawi.